Conciertu por Galicia

Durante tou esti sábadu l'auditoriu Príncipe Felipe d'Uviéu va tar enllenu de música con un conciertu especial que se fai gracies a una iniciativa cola que se quier apoyar a los que peor tan pasándolo en Galicia por cuenta de la marea prieta.El conciertu divídese en dos sesiones, una pela mañana y otra pela tarde. Na sesión de la mañana actuarán bandes de gaites y grupos de baille, representaes les primeres por "Villa de Mieres", "Fonte Fuecara" y "Xiranda", mientres que'l baille van ponelu "Na Señardá", "Trebolgu" y "Andecha folclor d'Uviéu" ente otros, aparte d'añadíos prestosos como la pareya de gaita y tambor de padre y fiu Pedro y Diego Pangua. Pela tarde nel escenariu van tar bandines y un par de grupos de folk. "La Galbana" "la Llosa" "La Bandina" o "Los Ciquitrinos", "Llangres" y "Guxán de Lluz" son dellos de los participantes d'esta sesión de la tarde, que va entamar a les 19 hores, mientres que la de la mañana va durar de 11 a 14 hores. El preciu ye de 5 euros por cada sesión.Esta iniciativa entámenla l' "Asociación del día de Galicia n'Asturies" y l'asociación musical "La Galbana". Los organizadores esplicaron a Asturies.com que les perres que se consigan van dir pa la Conseyería d'Asuntos Sociales de Galicia, que dicen que ye la encargada oficial en Galicia de repartir esti tipu d'aportaciones; los organizadores desestimaron otres posibilidaes como sedría el dar les perres direutamente a dalguna cofradía de pescadores o a la plataforma "Nunca mais".