Conciertos pa la entrada la primavera

Col bon tiempu apaecen propuestes de música en directo al aire llibre, mecíes colos conciertos en locales. "Corquiéu", "Merlín" "Skama la Rede" o "Odio Visceral" son dellos de los grupos que van tocar nos próximos díes.

De mano, mañana llega yá una cita clásica pa los aficionaos al folk. Ello ye qu'esti xueves 17 de marzu celébrase San Patricio, fiesta d'orixe anglosaxón y que ta mui arreyada a la cultura celta d'hoi en día, sobre too gracies a una conocida marca de cerveza prieto. El Café Trisquel nun pierde ocasión de celebrar esta fiesta, y pa ello trai a tocar al chigre al grupu "Merlín", la banda paralela de los miembros de "Lliberdón", que cada vez que pasa pel Trisquel aseguren una bona folixa. El conciertu de Merlín va entamar a eso de les 21:30 hores y al día siguiente, vienres 18, siguimos coles propuestes de folk asturiano, esta vegada de la mano de "Corquiéu". La banda procedente del oriente asturianu va tocar casi como en casa, porque va actuar nes fiestes de Posada de Llanes a eso de les 00:00 hores. "Corquiéu" va tocar delles pieces del so próximu discu "Salia", qu'estos díes ta acabando'l procesu de masterización n'Escocia y qu'esperen que tea na cai pa dientro trés o cuatro selmanes.

El sábadu 19, y otra vuelta en Xixón, cambiamos de palu radicalmente. Ello ye qu'a partir de les 19:30 hores na Sidrería La Fontaine, que ta na parroquia xixonesa de Cagüeñes, van tocar trés bandes asturianes de punk, trash metal y ska según el casu. Los grupos son "Misantropía", trash metal dende Xixón que debuten en directo nesti conciertu, "Skama la rede" dende Candás, grupu que ta preparando los temes del que tien ser el so primer discu que van grabar cola casa de discos "L'Aguañaz". Y p'acabar "Odio visceral", col so punk rock dende Xixón que va pesllar esti conciertu nel que la entrada val namás que trés euros.