Conciertos en L.lena y Tinéu

Xunta la Fiesta de la Oficialidá en Bimenes y la nueche folk de Teverga, Tuña, en conceyu Tinéu y la tradicional romería nel Prau L.lagüezos de L.lena completen, con bien de música, el panorama de folixes pa esti fin de selmana.

L'asociación de muyeres "Cuarto de la Riera" xunta la "Asociación cultural de Tuña" col sofitu del Conceyu de Tinéu entamen el sábadu la I Nueite Folk de Tuña. Pero esta nueite tamién va tener día, en cuantes que va haber música y actividaes dende pela tarde. Ello ye qu'a les 15:00 hores van actuar la "Banda de Gaitas de Tinéu", la "Banda de Gaitas El Rapigueiru " d'Allande y el grupu de Baille San L.luis tamién d'Allande. Nun va haber solo música, deporte del país con especial atención a los bolos de la modalidá local, mercáu con amuesa d'artesanos y charra de mitoloxía de Berto Peña a les 17:00 son dalgunes de les propuestes pa que vayamos yá de tarde hasta l'occidente asturianu. Pela nueche lleguen los conciertos de folk a les 22:00 hores, los grupos que van tocar son la banda de gaites la "Reina'l Truébanu", "La Bandina" de Santi Caleya tan solicitaos esti branu, "Llangres" y "N'arba". L'espaciu onde va desenvolvése'l conciertu y demás actividaes ye'l prau del palaciu "Cabolriu", entornu perespecial que de xuru va ayudar pa que la nueite seya máxica.

El día siguiente toca-y al conceyu L.lena entamar una folixa con música asturiano, esta vegada nel Prau L.lagüezos con motivu de la Fiesta del Corderu. Esta fiesta xira alrodiu de la ellaboración del tradicional corderu a la estaca. Nesta edición van preparáse un total de 130 corderos, que van sirvir pa dar fuerces a los que quieran disfrutar de la música coles actuaciones de Xuacu Amieva y "La Bandina" a les 17:00 hores. D'esta manera acaba un fin de selmana que concentró bien de conciertos n'Asturies, ensin contar col Derrame Rock que se desenvuelve en Pravia dende'l día ayeri.

D'otra manera, sigue en Muséu del Pueblu d'Asturies el programa de música y actividaes de los domingos, cola participación esti día 4 de xunetu del Grupu Folklóricu "Trebeyu"
xunta una amuesa del Equipu de Deporte Tradicional "El Valle"
Les actividaes van desarrollase ente les 11 y les 17.