‘Conceyu Bable. El frutu y la semiente’: 13 artículos y 150 semeyes históriques

El salón d’actos del Real Instituto de Estudios Asturianos (RIDEA) acoyó la presentación del llibru conmemorativu de la XLV Selmana de les Lletres Asturianes, dedicada a Conceyu Bable. Cuenta con 13 artículos y unes 150 semeyes, y va entregase de baldre cola compra d’una obra o discu n’asturianu’l vienres, Día de les Lletres Asturianes.

El presidente del país Adrián Barbón abre ‘Conceyu Bable. El frutu y la semiente’ col testu ‘Conceyu Bable: arguyu d’identidá’, al que sigue otru del coordinador del llibru y de les actividaes de la XVL Selmana de les Lletres Asturianes, Francisco ‘Paco’ Álvarez, con ‘Mediu sieglu qu’abarca un mileniu’, na que contestualiza’l llibru. La obra, que lleva en cubierta una fotografía de la histórica manifestación de Conceyu Bable en Xixón en xunu del 1976 baxo’l lema 'Bable a la escuela y autonomía rexonal' xunto con una de les neñes y neños de ‘Reciella. Families pol Asturianu’ nuna marcha pola oficialidá n’Uviéu, tien otres firmes bien destacaes, les siguientes:

• Arantza Margolles, ‘Conceyu Bable: la hestoria d’un suañu’.
• Pablo Batalla, ‘Un gritu, una bandera y un idioma nel que cantar. Les invenciones y recuperaciones simbóliques de Conceyu Bable’.
• David Guardado, ‘Conceyu Bable y la impugnación del discursu de la renuncia’.
• Marta Mori, ‘Muyeres en Conceyu’.
• Entrevista de Paco Álvarez a Xosé Antón González Riaño, “Conceyu Bable marca un enantes y un dempués na conceición social de la llingua asturiana”.
• Cristóbal Ruitiña, ‘‘Asturias Semanal’, periodismu democráticu (tamién) en llingua asturiana’.
• Graciano García, ‘‘Asturias Semanal’ y Conceyu Bable’.
• Laura González, ‘Un colectivu que despertó conciencies’.
• Benigno Delmiro Coto, ‘Lletres entonaes a la vera’l castillete del Pozu L’Entregu’.
• Ramón d’Andrés, ‘Conceyu Bable na ayalga de la memoria personal’.
• Faustino Álvarez, ‘Mirando atrás con esperanza: los 48 años del Conceyu Diego Suárez d’Urbiés de Conceyu Bable’.

Na presentación del llibru, celebrada ayeri, participó la conseyera de Cultura, Política Llingüística y Deporte, Ana Vanessa Gutiérrez, y el presidente del RIDEA, Ramón Rodríguez Álvarez. Intervinieron amás Paco Álvarez y dos de los autores, Margolles y D’Andrés, que protagonizaron un alderique sobre’l coleutivu homenaxáu nesta edición de la Selmana de les Lletres Asturianes.

Con un 10 por cientu de descuentu

La manera de consiguir un exemplar de ‘Conceyu Bable. El frutu y la semiente’ ye acudir el vienres a dalguna del mediu centenar de llibreríes participantes na promoción pol Día de les Lletres Asturianes pa la compra de discos y llibros n’asturianu, que van tener un 10 por cientu de descuentu. Nel casu del gallego-asturiano, va entregase, tamién de baldre, el llibru infantil ‘Dedín, dedín...’, de Belén Rico.

Éstes son les llibreríes onde facese col llibru conmemorativu de la XL Selmana de les Lletres Asturianes:

• Uviéu: Aldaba Regalos, Aldebarán, Antares, Casa del Libro (tamién gallego-asturiano), Cervantes (tamién gallego-asturiano), Chemi, Diocesana, Elías, Esfera, Garluc, Hangar Rebelde, Maribel, Matadero Uno, Pasa Página, Puntos, San Pablo y Trabe (tamién en gallego-asturiano).
• Xixón: Acuarel, Amez, De Bolsillo, La Buena Letra, Central, Clarín, Gizzmo Cómics, La Habitación Propia, La Madriguera, Paradiso, La Quince, La Revoltosa, Roy, Mundo Sonoro y Musicasturiana.com.
• Avilés: Casona, Clarín, La Crisálida, Víctor Núñez, Elepé Producciones y ‘Avilés, ¡Qué Guapina Yes!’.
• Mieres: Disco 55, La Llocura, La Pilarica y La Torre.
• A Veiga: Casa Pérez, Patefa y San Pedro.
• Siero: Fnac, La Chimenea y Naredo.
• Cangas del Narcea: Treito.
• El Franco: Alfonso.
• Grau: Las Dos Vías.
• Llaviana: Arvin.
• Noreña: La Semeya.
• Parres: Gestión.
• Piloña: Rima.
• Samartín del Rei Aurelio: Sol.

Na semeya, el direutor xeneral d'Aición Cultural y Normalización Llingüística, Antón García; D'Andrés; Margolles; la tamién articulista nel llibru Laura González; Gutiérrez; Rodríguez Álvarez y Álvarez.