Conceyu Abiertu por Noreña plantega ayudes pa caltener los 37 horros y paneres inventariaos

|
Panera decorada de Les Cabañes (Noreña)

Apunta la necesidá de facer un siguimientu del so estáu y mirar pol cumplimientu del deber de la propiedá de mantenelos.

"Nos últimos tiempos tamos viendo que, por falta d'actuaciones de caltenimientu, tán degradándose distintos horros y paneres, dalgunos inclusive de los protexíos" nel Catálogu Urbanísticu, apunta l'edil de Conceyu Abiertu por Noreña, Antonio Martínez Fernández. Ente elles ta la panera de Guerrillero Fombella númberu 26 (proteición parcial) o la panera decorada de Les Cabañes (proteición integral), según señala la moción presentada na Comisión de Cultura pola candidatura de xunidá popular.

Los nacionalistes puntualicen qu'esisten otros elementos fuera del Catálogu Urbanísticu, bien por nun tener inda l'antigüedá necesaria pa la so inclusión o por non cuntar con otros elementos singulares pa faelo magar ello, ensin escaecer que, por tar en mui males condiciones, dalgunos escluyéronse quedando 'restos d'horru' o 'restos  de panera'. "Con tou, pesie l’amenorgue na segunda metá del sieglu XX d'esti tipu de construcciones, cuntamos con un nada refalgable conxuntu que ye necesario caltener, con especial atención a aquellos elementos susceptibles yá de proteición. Nesi oxetivu de que Noreña caltenga'l so patrimoniu etnográficu ye necesaria la implicación de l'alministración local, aídando y xixilando", asegura Martínez Fernández.

Poro, reclama que'l Conceyu afite unes llinies d'ayuda, al igual qu'otros ayuntamientos, "pa fomentar que se realicen trabayos de caltenimientu o reconstrucción", al empar "de facer un siguimientu del estáu d'horros y paneres pa, si ye necesario, riquir a la propiedá qu'atienda a la so deber de caltenimientu. Con dambes actuaciones puede consiguise frenar la degradación continuo y esmolecedor que sufren dellos elementos, asina como prevenir estes situaciones".

Na semeya, la panera decorada de Les Cabañes.

Contador Estadistiques