Conceyu Abiertu por Noreña critica l’actitú del PSOE na ellaboración de los presupuestos municipales

La formación Conceyu Abiertu por Noreña amuesa’l so malestar pola actitú del gobiernu municipal del PSOE na ellaboración de los presupuestos. Critica que nun se permita a los ediles de la oposición facer una copia del borrador.
 
“Consideramos un déficit democráticu inxistificable’l fechu de que dende’l gobiernu se decidiere nun permitir a los conceyales de la oposición facer copia del borrador de presupuestos, al que tan sólo puede acceder a él los miembros del Plenu municipal de 8 a 15 hores na sala de conceyales”, señalen dende la plataforma d’eleutores nun comunicáu, organización que ve nesta posición del PSOE y del alcalde, César Movilla, “un episodiu más” de la so actitú “antidemocrática”. Conceyu Abiertu por Noreña, con un representante na Casa Conceyu, reclama “unos presupuestos participativos, onde’l pueblu de Noreña pueda ser parte activa de la so ellaboración”, poniendo como exemplu’l conceyu vecín de Siero, onde “un gobiernu tamién del PSOE ellaboró los presupuestos de forma participativa mentantu en Noreña un alcalde del mesmu color políticu nun sólo nun permite la participación ciudadana, sinón qu’impide facer copia del documentu a los propios conceyales de la oposición”.
 
D’igual forma, asegura que l’edil Pablo Pérez va defender unos presupuestos onde prime “lo social”, amás de proponer que’l Conceyu nun aplique la reforma llaboral nueva impulsada pol Gobiernu estatal dientro d’una fola de “recortes sociales y económicos de corte neolliberal que se vienen promoviendo dende los gobiernos d’España o Asturies” que nun sólo “nun tán valiendo pa salir de la crisis, sinón que tán xenerando más crisis social”.