La Fundación Jóvenes Empresarios, col sofitu de la Fundación Botín, entama'l xueves en L’Entregu l’eventu ‘Conecta 4x4’ pa poner en contautu a paraos y patronal. Conceyu Abiertu convoca una protesta énte un actu “hipócrita y cínicu”.
La cuenca’l Nalón foi’l llugar escoyíu pola seición asturiana d’esti coleutivu d’empresarios mozos pa continuar con esta iniciativa enmarcada dientro del programa ‘Emplea-t 4x4’ y que tuvo’l so primer actu n’Uviéu. Tres L’Entregu, tán previstos otros tanto en poblaciones de Samartín del Rei Aurelio como en Llangréu, conceyos que collaboren cola organización. L’oxetivu de ‘Conecta 4x4’ ye poner en contautu a paraos y empresarios cola intención de dinamizar el mercáu llaboral. Nel casu del eventu de L’Entregu, ta prevista la participación de 200 persones, de los que 110 son persones ensin trabayu.
Esta iniciativa recibe la oposición de Conceyu Abiertu por Samartín del Rei Aurelio y Conceyu Abiertu por Llangréu, que convocaron un actu de protesta delantre del IES Virxe de Cuadonga pa les 15.45 hores, un cuartu d’hora enantes de que principie l’eventu, baxo’l nome de ‘Botín danos un puestín. Non más hiprocresía de la patronal cacique’. Pa la formación nacionalista, ‘Conecta 4x4’ “ye un eventu oportunista, hipócrita y cínicu de la patronal”.
“La Fundación Jóvenes Empresarios y la Fundación Botín entamen esti eventu col envís de llavar la imaxe y la cara de la patronal nel mesmu momentu que los valles mineros algamen un récor históricu na cifra de desemplegu”, señalen dende Conceyu Abiertu nun comunicáu nel qu’añaden que “los ayuntamientos de Llangréu y Samartín del Rei Aurelio, gobernaos pol PSOE, collaboren col eventu d'esta patronal cacique, agradecida enforma poles reformes llaborales del PPSOE, que-yos permite precarizar aínda más el trabayu, despidir xente d'una forma más cenciella y barata, y nun respetar los drechos llaborales mínimos”. Por esti motivu, los nacionalistes entienden “qu'hemos de protestar nesi llugar esti xueves pola pergrave situación socioeconómica que viven los nuesos conceyos y Asturies y pol perversu fondu qu'escuende esti actu, eventu que quier ufiertar a la sociedá una imaxe humana de los mesmos que tan dexando na miseria a pueblos enteros como los de nueso y que quier facer llegar a la xente la perceición de que los grandes empresarios tienen sensibilidá social”.
La Semiente sofita la manifestación
El Centru Social Autoxestionáu La Semiente tamién se suma al actu de protesta de mañana énte un eventu de la banca y de la patronal que consideren “hipócrita”. “Unos y otros vienen machacándonos día a día ensin dudalo nin un momentu, esplotándonos, encadenándonos a hipóteques que nun podemos pagar, con reformes llaborales cómplices qu’afueguen a tola clas obrera, echándonos de les nueses cases y pensando únicamente nos sos beneficios personales. Pero agora, quieren llavar el focicu con un eventu que venden como ‘la panacea’ énte los sangrantes númberos de paru nes cuenques”, señalen dende esti coleutivu, qu’afirma nun tragar “con esta mentira”.
Adxuntu | Tamañu |
---|---|
![]() | 103.88 KB |