Conceyu Abiertu echa a andar como un proyeutu de futuru basáu nel trabayu dende los conceyos

El sábadu pasáu diose a conocer Conceyu Abiertu, candidatura d’unidá popular que va participar nes eleiciones de mayu. Esti proyeutu políticu nuevu dende la esquierda soberanista naz col oxetivu de tener una continuidá al llargu plazu.
 
Un bon númberu de persones averáronse a la Biblioteca Xovellanos de Xixón pa conocer esti proyeutu que, en pallabres de los sos impulsores, nun ye una formación política nin una marca eleutoral pa les eleiciones de mayu, sinón un movimientu popular que va tener continuidá tres la cita coles urnes. Nel so manifiestu fundacional, Conceyu Abiertu defínese como “un grupu de ciudadanos procedentes de distintos ámbitos políticos, sociales, sindicales, culturales y de movimientos populares de diversu tipu, que conscientes de la ineficacia de les polítiques d’anguañu y de la gravísima crisis permanente que sufre la sociedá asturiana, consideramos que llegó'l momentu de buscar nueves maneres de facer política entamando un movimientu de reconstruición nacional y social dende la base”, o lo que ye lo mesmo, dende los conceyos.
 
El nome de Conceyu Abiertu vien dáu pola intención de “reivindicar esta institución de la tradición comuñal asturiana como una ferramienta coleutiva que nel momentu presente tien que sirvir pa sumar voluntaes, y que nel futuru tendrá de ser la estructura de base d'una democracia participativa n’Asturies”. Nesti manifiestu fundacional, les persones que formen esti proyeutu criticaron la “situación de crisis social, económica, identitaria y política que vivimos n’Asturies”; l’apoltronamientu de la clase política; les cifres altes de paru y la emigración a la que se ven forzaos los mozos y moces asturianos; la situación llamentable de los elementos identitarios del país, ente ellos de forma especial la llingua asturiana; y les agresiones al entornu natural. Amás, dende Conceyu Abiertu consideren “perimportante desendolcar un procesu de rearticulación coleutiva dende los conceyos afitando un proyeutu de renovación política p’Asturies al traviés de la creación d’una base social que lu pueda sostener nel tiempu”.
 
“El movimientu ciudadanu Conceyu Abiertu, naguando pola ellaboración dende abaxu de nueves metodoloxíes, dinámiques y ferramientes polítiques a curtiu y llargu plazu, opta por estructurase como una rede de plataformes asamblearies d'ámbitu llocal”, finaliza’l manifiestu. Nel actu de presentación d’esti proyeutu nuevu dende la esquierda nacionalista intervinieron David Álvarez, Paloma García y Mariu Arbesú.