Conceyu Abiertu convida a la ciudadanía a participar na Coordinadora Nacional del sábadu

Noreña ye’l llugar escoyíu por Conceyu Abiertu pa celebrar esti sábadu la Coordinadora Nacional de la plataforma d’eleutores. Dende la formación nacionalista conviden a la ciudadanía a participar nella pa sumar opiniones.

“Conceyu Abiertu, dientru de la so dinámica de puxar pola participación popular, invita a tola ciudadanía a participar na Coordinadora Nacional convocada pal 19 de xineru na sala d’aconceyamientos del depósitu d’agües antiguu de Noreña (cai El Reló) , de magar les 18.30 hores en primer convocatoria, y 19 hores en segunda”, señala la plataforma d’eleutores nun comunicáu. La Coordinadora Nacional trátase del órganu asambleariu de la formación, nel que participen tolos conceyos que conformen el proyeutu, asina como toles persones que quieran acudir a títulu individual pal alderique y la toma de decisiones sobre delles cuestiones.

L’orde del día previstu pal sábadu ye’l siguiente: llectura del acta de la Coordinadora Nacional anterior; información de la campaña contra la resquiebra hidráulica o fracking; alderique sobre la puesta en marcha de dinámiques en defensa de los conceyos asturianos; información por conceyos; puesta en marcha d'estayes y anovación de la Xunta Executiva de Conceyu Abiertu; ayalguería; sofitu a represalios de los desallugos n’Asturies; documentu sobre usu/aprofitamientu de les redes sociales como ferramientes de llucha; y dellos asuntos que nun tean nos puntos del día.