Conceyu Abiertu avanza na constitución de les plataformes ciudadanes llocales

La candidatura d’unidá popular Conceyu Abiertu ta avanzando na constitución de les plataformes ciudadanes llocales que participen nel proyeutu. Esti sábadu, al meudía, va presentase la de Samartín del Rei Aurelio nel Centru Social de L’Entregu.
 
La de Samartín del Rei Aurelio ye la primera plataforma ciudadana llocal de Conceyu Abiertu en constituyise, anque tamién tán mui avanzaes les de Xixón, Grau, Noreña, Villaviciosa y Llangréu. Éstos nun van ser los únicos conceyos nos que va tener presencia Conceyu Abiertu, yá que, según anuncien dende la formación, el procesu de conformación d’estes plataformes ta entamanado en dellos puntos del país.
 
 L’actu de presentación de Conceyu Abiertu en Samartín del Rei Aurelio va celebrase nel salón d’actos del Centru Social de L’Entregu a les 12 hores. Nél, van tratase delles problemátiques del conceyu y los asistentes van poder conocer qué ye’l proyeutu Conceyu Abiertu.