Concentración de sofitu a Radio Sele

La Xunta pola Defensa de la Llingua convoca pa mañana vienres día 19 una concentración sofitando a la emisora de radio n'asturianu Radio Sele. Esta emisora desixe que se-y devuelva la llicencia d'emisión depués de ganar va añu y mediu un contenciosu a l'alministración asturiana.

Nel añu 1999 el gobiernu asturianu, que nesi momentu yá presidía Vicente Álvarez Areces, retiró la llicencia que Radio Sele ganara nun concursu de llicencies d'emisión comercial. La llicencia foi a parar a otru demandante de permisu d'emisión que quedara per detrás nel concursu. Radio Sele entamó daquella una dura batalla llegal nos tribunales pa recuperar la so llicencia, y pa iguar lo que dende la emisora n'asturianu consideren una clara inxusticia y amuesa d'amiguismu por parte del gobiernu asturianu. Yá naquellos momentos esta revindicación llegó a les cais con una manifestación peles cais d'Uviéu y un festival nel Auditoriu Príncipe Felipe d'Uviéu. Va añu y mediu resolvióse'l contenciosu que presentó Radio Sele nel Tribunal Superior de Xusticia d'Asturies a favor de Radio Sele. Depués d'esti tiempu dende la emisora piden que tres de la sentencia se-y tien que devolver la sentencia a Radio Sele, y consideren que nun ye de recibu que nestos momentos tea emitiendo otra radio nel dial que-y correspuende a Radio Sele, y que llantaren inclusu una emisora que furrula como repetidor de Punto Radio.

La concentración, que ye a les 19:00 hores de mañana vienres 19 delantre de la Xunta Xeneral del Principáu na cai Fruela d'Uviéu, recibió ayeri miécoles al traviés d'un comunicáu'l sofitu del Bloque por Asturies, comunicáu nel que considera la situación llamentable y fai un llamamientu al presidente del Principáu pa que "cumpla cola sentencia dictada pol Tribunal Supremu de Xusticia d'Asturies na que'l xuez falló a favor de la emisora, declarando'l concursu ilegal, dando razón a la emisora pa que se-yos devuelva la so llicencia".