Compromisu, Sumar y Iniciativa reclamen l'usu de la toponimia oficial na estación de La Pola y en tola rede de ferrocarril

Importante respuesta a la sustitución de cartelos con 'La Pola' pa usar el derogáu 'Pola de Lena' cola llegada de la velocidá alta ferroviaria'l cola apertura de la variante de Payares.

Foron munches les reaiciones depués de la espublización ayeri n'Asturies.com de la información de la sustitución de cartelos na estación de La Pola instalaos va poco que recoyíen el topónimu oficial por otres cola señalética de la llarga distancia de Renfe na qu'ésti se perdía. La Xunta pola Defensa de la Llingua foi'l primeru esta mañana, lo que provocó una respuesta del presidente Adrián Barbón pa confirmar que'l so Gobiernu yá moviera ficha pa contautar con Adif "pa esixi-yos que respeten la toponimia oficial d’Asturies", pero otros coleutivos y partíos tamién se pronunciaron al respeutu y reclamaron el cumplimientu de la llegaligá en materia toponímica.

L'asuntu llegó al Plenu del Conceyu de Ḷḷena de manu de Compromisu por Asturies (Conciyu Ḷḷena). La formación asturianista pidió al equipu de gobiernu "qu'encamentara al ADIF a retirar los nuevos cartelos que punxeron na estación de tren nos que incumplen cola toponimia oficial y ponelos col topónimu correutu: La Pola'.

El diputáu asturianu de Sumar nel Congresu, Rafael Cofiño, pela so parte, unvió-y un escritu n'asturianu y castellanu a María Luisa Domínguez González, presidenta d'Adif, pa tresmiti-y el so "esmolecimientu énte la posibilidá de que la cartelería de l'alta velocidá n'Asturies inore o incumpla la toponimia oficial de la comunidá". Na mesma encamienta-y "non sólo a reponer la denominación 'La Pola' na cartelería indicada", sinón tamién a "garantizar l'usu de la toponimia oficial asturiana en tola señalética, cartelería y avisos por megafonía –y otres comunicaciones al públicu– del conxuntu de la rede ferroviaria".

Reposición de los indicadores

Iniciativa pol Asturianu reclama tamién al Alministrador d’Infraestructures Ferroviaries (Adif) "que dea marcha atrás nos sos planes y reponga de forma inmediata los cartelos de la estación de tren de La Pola, nel conceyu de Ḷḷena" al entender que "los cambeos previstos na estación ḷḷeniza p’adaptase a la alta velocidá ferroviaria nun pueden suponer pasos atrás" nel usu de los nomes de llugar asturianos. La organización, que tamién treslladó'l so esmolecimientu y pidió mediación a la viceconseyera de Cultura, Política Llingüística y Turismu, Ana Vanessa Gutiérrez, afala a la entidá pública "a poner más procuru nel cumplimientu de la toponimia oficial en toles infraestructures de la so rede n’Asturies".