Compromisu por Xixón critica’l papel xugáu pola Policía Llocal na xornada de paru del miércoles

La participación de la Policía Llocal na carga y detención de cuatro persones na xornada de fuelga xeneral del miércoles foi criticada por Compromisu por Xixón. Tamién llamentó l’intentu d’asaltu a la Casa Sindical.

La formación nacionalista calificó de “llamentable l'actitú de la Policía Llocal na xornada de la fuelga xeneral”, al ponese “al serviciu de la Policía Nacional pa provocar disturbios innecesarios y asina favorecer la intervención de les fuerces d’antidisturbios”, y aseguró que pa “Foru y PP debe ser un arguyu terrible que s'asaltara la Casa Sindical, lo que nun ye más qu'otru pasu na esguilada represiva que quieren imponenos pa siguir col camín de retayos sociales y eliminación de derechos”. Nesi sen, considera que la organización que lleva les riendes del gobiernu municipal y quien la caltién al frente del Conceyu tienen un pautu de “represión de los trabayadores y movimientos sociales”. Compromisu rellaciona esta actitú de la Policía Llocal cola ordenanza de convivencia que dambes formaciones quieren sacar alantre y que, na so opinión, nun ye más qu’una forma de “evitar les protestes y les aiciones reivindicatives” baxo la escusa de la prohibición del ‘botellón’.

Nun comunicáu robláu por Daniel Fernández, voceru de Compromisu por Xixón, la organización esixe “la retirada inmediata de tolos cargos a los cuatro deteníos na xornada d'ayeri, qu'abondo castigu sufrieron cola mesma detención por defender los sos derechos llaborales y polos golpes recibíos pola Policía Local y/o Nacional”. Al tiempu, empondera la reaición de los ciudadanos que s’averaron a la Comisaría de Xixón pa reclamar la puesta en llibertá de los arrestaos pela mañana na cai Llangréu y L’Acerona.