Compromisu por Uviéu afala al alcalde pa que’l conceyu se sume al billete únicu de tresporte

Uviéu continúa ensin entrar nel Consorciu de Tresportes d’Asturies (CTA)  y los ciudadanos siguen sufriendo los inconvenientes de nun poder usar el billete únicu. Compromisu por Uviéu afala al alcalde pa que solucione esta situación.

N’avientu, Agustín Iglesias Caunedo anunciara pa finales de xineru la entrada d’Uviéu nel CTA –ye l’únicu conceyu asturianu que se caltién fuera–, pero la realidá ye que yá entró la primavera y los ciudadanos continúen ensin poder utilizar el billete únicu nel conceyu. “Una ciudá como Uviéu nun puede permitise nun facilitar a los sos vecinos y al restu d’asturianos un acceso cómodu y asequible a les instituciones alministratives, académiques y de servicios que suponen la capitalidá d’Asturies”, afirmen dende Compromisu por Uviéu, organización qu’urxe al alcalde a solucionar esti problema.

“Pidimos que tolos grupos políticos con representación na Casa Conceyu aprueben una resolución pa incluyir a Uviéu nel CTA cuanto primero” y qu’Iglesias Caunedo “aclarie en qué situación tán les negociaciones sobre la inclusión” nel consorciu, “yá que ye una marxinación que se prolonga nel tiempu y qu’afeuta a los usuarios d’esti conceyu, pero tamién a tolos asturianos que se manden del tresporte público p’allegase a la ciudá”. D’igual forma, la federación de partíos recuerda al Gobiernu que la entrada d’Uviéu na CTA yera ún de les sos promeses de Javier Fernández como candidatu a la presidencia del país.