Compromisu por Carreño fai públicu l’alcuerdu programáticu col PSOE p’apoyar los presupuestos

La selmana pasada, el gobiernu del PSOE en Carreño sacaba alantre los presupuestos municipales col apoyu del conceyal d’UNA-BA, Roberto Holgado, y del PCPE. Compromisu fixo públicu esti llunes l’alcuerdu colos socialistes.

Esti documentu, robláu’l martes pasáu por Holgado y por Amelia Fernández López, rexistra los puntos que dambes formaciones alcordaron desendolcar de cara a esti añu políticu. En total son 14: un compromisu presupestariu col emplegu; un aumentu de les prestaciones sociales; el saniamientu d’agües nes zones qu’afeuten a les playes; una apueste poles enerxíes renovables; la contratación d’una auditoría pa controlar, como mínimo, la calidá del aire nel conceyu; actuaciones urbanístiques na fábrica d’Ortiz y pa facilitar la movilidá pa les persones con discapacidaes; el desarrollu d’un proyeutu de güertos públicos ecolóxicos; el desendolcu d’un Puntu Llimpiu; actuaciones pa la ordenación del territoriu forestal de Carreño; la ellaboración d’una propuesta pa desarrollar presupuestos participativos; el compromisu a la implicación activa del Conceyu de Carreño en cualquier procesu de desallugu d’una primer vivienda; puxar por politiques actives socialmente; l’entamu de polítiques de promoción social de la llingua asturiana de cara a la normalización del idioma en toles estayes de la vida pública, asina como una defensa de la Oficina de Normalización de la Mancomunidá d’El Cabu Peñes; y una ampliación y meyora de la ufierta de los Cursos d’Estensión Cultural.

“La nuestra organización tien claru’l so compromisu con Carreño, colos valores de la izquierda, ambientalistes ya identitarios. Nun nos conformamos con esistir. Tamos na política de Carreño pa tresformar y pa condicionar el gobiernu de la nuestra tierra. Vamos poner tol nuestru enfotu y tol nuestru tiempu pa meyorar la gobernanza de Carreño”, señala la federación de partíos compuesta por Bloque por Asturies, Unidá Nacionalista Asturiana (UNA) y independientes na so páxina web, onde tamién se pue consultar la intervención completa d’Holgado nel Plenu de Presupuestos 2013.

Nél, l’alcalde socialista Ángel Riego consiguió sacar alantres les cuentes municipales gracies a l’apoyu d’UNA-BA –nome col que se presentó la formación a les eleiciones en Carreño– y del PCPE, y a l’astención de Carreño Unido (CA-UN). Izquierda Xunida (IX), Foro Asturias Ciudadano (FAC), Partido Popular (PP) y Unión Independiente de Carreño (UICA), votaron en contra de los presupuestos.