Compromisu por Asturies d’Uviéu reclama un accesu dignu al HUCA

La falta d’un proyeutu pa la construcción d’un accesu pal Hospital Universitariu Central d’Asturies (HUCA) esmolez a Compromisu por Asturies d’Uvieú. La organización encamienta al Gobiernu a trabayar nello.

Tres delles inauguraciones, toes elles de calter eleutoralista, yá que la instalación nun ta finada y nun tien fecha pa la so apertura –a lo qu’hai que sumar el so sobrecoste brutal–, lo cierto ye que tovía nun hai un proyeutu definíu pa los accesos al centru sanitariu, dalgo que sorprende a Compromisu. “Dende l'empiezu del proyeutu del hospital nuevu nos terrenos de La Cadellada, el Principáu comprometiérase a acometer les obres d'accesu dende l'AS-II. A día de güei y a pesar del vergonzosu sobrecostu de la obra, nin siquiera esiste proyeutu. Énte una futura anque impredicible apertura del complexu, depués de delles inaguraciones, atopámonos con un accesu deficitariu na redolada de les gasolineras”, espliquen nun comunicáu.

La federación de partíos esplica qu’ésti “foi namái pensáu pa dar serviciu a los vecinos de la otra mano la vía y caltenelos xuníos al barriu de La Corredoria cuando l’autopista nueva cortó l'accesu qu'esistía enantes pero non p'acoyer l'importante volume de tráficu que va suponer l'apertura del hospital nuevu”. Amás, asegura que ye estrechu, lo que dificulta’l pasu d’autobuses y vehículos, y que’l so estáu ye “llamentable”. Por esti motivu, encamienta al Executivu “a estudiar un proyeutu nuevu n'otru allugamientu que pueda absorber el tráficu que va provocar l’apertura supuesta del hospital nuevu”.

Crítiques al PP pola Y de Bimenes

Compromisu por Asturies del Nalón esixó güei al Gobiernu estatal el cumplimientu de les sos promeses eleutorales no que respeuta a los Fondos Mineros comprometíos nel Plan del Carbón. En concreto, reclama la finalización de los trabayos de la nomada Y de Bimenes. Pa los nacionalistes, tres les decisiones del PP “escuéndese la determinación de siguir incumpliendo'l so programa eleutoral y los alcuerdos suscritos col Gobiernu asturianu y colos ayuntamientos, n'otres tantes obres n'execución, paralizaes  pola so decisión, mientres se prioricen actuaciones n'otros llugares del Estáu español más rentables no eleutoral pa los sos intereses”.

“A pesar de que nel so momentu manifestámonos en contra de la Y de Bimenes porque entendíamos que la so rentabilidá yera más que discutible por cuenta de la enorme inversión económica necesaria pa la so execución y les escases meyores que representaría una vegada fecha la conexón ente l'Autovía del Cantábricu y la Minera, amás del enorme costu medioambiental que significaba pa les zones que travesaba, entendemos que, llegaos a esti puntu, non cabe de nenguna manera parar una actuación  que'l so presupuestu ronda los 175.000.000 d'euros, d'ellos 45 millones, siquier, de sobrecostos”, continúa Compromisu nel comunicáu. La federación de partíos considera “inaceptable treslladar a la mesa del carbón la decisión d'arrenunciar a inversiones yá comprometíes y n'execución”.