Compromisu por Asturies celebró un actu en Xixón contra la incineradora

La ofensiva nueva de la FSA-PSOE pa la construcción d’una incineradora nes instalaciones de Coxersa llevó a Compromisu por Asturies a movilizase. La federación de partíos entamó un actu’l sábadu frente al Puntu Llimpiu de Roces.

Yolanda Huergo, vocera nacional de Compromisu; Roberto Holgado, conceyal d’UNA-Bloque en Carreño; y Daniel Fernández, voceru de la formación en Xixón, encabezaron esta protesta, na que participaron una docena de militantes y simpatizantes. Éstos dedicáronse a representar una separación de basures según el so tipu mientres una simulación d'incineradora nun paraba d’echar fumu. D’esta forma, Compromisu por Asturies pretendía defender el reciclaxe como sistema de xestión de residuos frente a la incineración, política que la FSA-PSOE defende p’Asturies mientres el so partíu refúgala como alternativa nel restu del Estáu.

“Pa qu’una incineradora sía rentable tien que quemar residuos; polo tanto, esto va en contra del reciclaxe” destacó Huergo, qu’añadió que “si se respeten les tases de reciclaxe que se supón que debe haber, esti sobredimensionamientu de la incineradora fainos sospechar que les intenciones del Gobierno son trayer basures d’otres partes pa quemales n’Asturies”. La federación de partíos entamó esta movilización como respuesta a les pretensiones de la FSA-PSOE de retomar el proyeutu de la incineradora, nesta ocasión rebaxando’l so tamañu, lo que permitiría quemar 80.000 tonelaes menos que na deseada baxo’l Gobiernu de Vicente Álvarez Areces. Sicasí, los planes nuevos de los socialistes planteguen incinerar residuos nes instalaciones de la cementera d’Aboño otros 65.000 tonelaes en forma de combustibles de residuos, col impautu qu’ello supón.

Na semeya, Holgado, Huergo y Fernández, con dalgunos de los militantes que participaron na representación de protesta.