Compromisu alerta de la poca capacidá de respuesta del país énte la folada recentralizadora actual

Compromisu por Asturies celebró’l Día de la Nación Asturiana con un actu políticu en Perlora. Na so intervención, Yolanda Huergo alertó de la poca capacidá de respuesta que tien Asturies énte la folada recentralizadora actual.

El Llagar del Restaurante Casona El Carmen de Perlora, nel conceyu de Carreño, onde Unidá Nacionalista Asturiana (UNA)-Bloque por Asturies tien representación municipal, foi’l llugar escoyíu por Compromisu por Asturies p’abrir el cursu políticu actual y festexar xunto a militantes y simpatizantes el Día de la Nación Asturiana. L’actu consistió en dos intervenciones a cargu de la vocera de la federación de partíos de creación nueva, Yolanda Huergo, y del conceyal Roberto Holgado, que reafirmaron el compromisu de la organización “pa defender el futuru d’Asturies frente al retrocesu económicu, social y política actual”, y nuna espicha.

Huergo señaló énte los presentes que “el 8 de setiembre ha de ser un día pa recordar qu’Asturies, nel contestu actual de crisis, tien amenaciáu de manera seria’l so futuru, yá qu’a la crisis económica-estructural que sufrimos nos 30 años últimos, a los ataques continuos a la identidá asturiana, y a la condición subordinada y periférica a la que se nos condenó, se suma un retrocesu xeneral nuevu de derechos sociales, llaborales y económicos qu’amenacen con convertir de forma definitiva a Asturies nun país esmanteláu nel que’l futuru únicu sía la emigración xeneralizada a la que yá se vieron obligaes delles xeneraciones de mozos”. Amás, la vocera de Compromisu alertó de la llegada d’una fola recentralizadora nueva que busca la uniformación del Estáu y énte la qu’Asturies nun tien capacidá de respuesta, y anunció que la federación nacionalista de partíos va trabayar por consolidar “una alternativa pensada dende, por y p’Asturies, que consiga crear un polu referencial de discursu, aición, movilización y influencia que permita revertir una situación na que poco hai que celebrar”.

Pela so parte, Holgado destacó la importancia que tien el trabayu nos conceyos pa la consolidación de la formación y informó a la militancia de los avances en democracia y presupuestos participativos que, a propuesta de Compromisu por Asturies, tán faciéndose en Carreño. L’edil tamién resaltó’l crecimientu que ta teniendo la federación de partíos dende l’entamu del procesu ‘Compromisu’ y animó a tola xente de la izquierda, l’ecoloxismu y l’asturianismu a sumase al proyeutu.

Na semeya, un momentu del actu polítcu, con Huergo y Holgado al fondu.