Compostela presenta la so ufierta de vuelos baratos

Na redolada d'Asturies espoxiga la ufierta de vuelos baratos. Agora ye Ryanair la que ta acabante de dar anuncia de que dende'l mes d'abril van operar una llinia diaria ente l'aeropuertu de Lavacolla, en Compostela, cola terminal de Londres-Stansted. Como ganchu d'ufierta, la compañía irlandesa pon un preciu de salida qu'incluye ufiertes a partir de los 2,99 euros el billete (tases aparte). La instalación de Ryanair en Compostela, que va ser base d'operaciones pa la compañía, va enanchase cola creación dende ochobre d'una segunda llinia con Frankfurt, y l'alcalde de la ciudá diz que pal 2006 puen ponese en marcha dos vuelos más con destinos por apautar y otru más pal 2007.

Lavacolla nun ye la única manera de llegar a Londres-Stansted dende cerca d'Asturies. En setiembre, Ryanair estrenó la so llinia con esti aeropuertu dende Santander, tamién con precios de salida que rayaben el regalu, y dende esti mesmu aeropuertu ye posible volar a precios mui perbaxo de los de les llinies aerees convencionales a los aeropuertos de Frankfurt-Hahn n'Alemaña y de Roma-Ciampino n'Italia. Un poco más pal este, dende Bilbao, Easyjet tien dos aviones diarios con Londres-Stansted y dende'l sur, l'aeropuertu de Valladolid tien serviciu de Ryanair con londres Stansted y con Bruxeles-Charleroi. El modestísimu aeropuertu de Llión, anque nun entra nes ufiertes de les grandes compañíes de vuelos baratos poles sos dimensiones, tien la ufierta de Lagunair, que pon aviones d'hélice con tolos aeródromos españoles a precios conteníos. Curiosamente, la crisis en Lagunair podría provocar la entrada nel so accionariáu d'una empresa asturiana, ALSA.

Ranón, de momentu, ye una islla arrodiada d'ufiertes pa volar barato Europa, anque ta por concretase'l prealcuerdu que s'anunciare'l mes d'ochobre ente'l Principáu y la compañía Easyjet. La portavoz del gobiernu Ana Rosa Migoya diere anuncia entós de que la compañía inglesa diba conectar Ranón con Londres y Berlín y que'l serviciu diba echar a andar nel primer trimestre del 2005, anque la web d'Easyjet onde apaecen les llinies que van a entrar en funcionamientu a lo llargo del 2005 entovía nun da anuncia de la entrada en serviciu d'estes llinies, que de mano nun fueron un oxetivu prioritariu pal Gobiernu asturianu y qu'hasta llegó a refugar esplícitamente la portavoz del gobiernu y Conseyera de Cultura nunes declaraciones en que dixo que la entrada de los vuelos baratos podía dañar el turismu rural asturianu al llevar fuera del país el turismu interior. El presidente Areces rectificó la posición de la Conseyera nel Debate de Posicionamientu Políticu de la Xunta Xeneral del Principáu, dando anuncia de que se taben estudiando posibilidaes pa traer los vuelos baratos a Asturies, produciéndose a la fin n'ochobre l'anuncia del alcuerdu con Easyjet qu'agora ta pendiente de facese realidá.