Completóse la dirección de la TV autonómica

El director del énte de comunicación del Principáu, José Ramón Pérez Ornia, ta acabante de dar a conocer el nome del equipu humanu que va iguar los cargos altos de la dirección de la TV autonómica y les funciones que-yos van corresponder.


Juan José Guerenabarrena Ormaechea va ser director d'Antena y Conteníos. Nacíu en Salinas nel 1957 ye llicenciáu en Filosofía y Lletres y tituláu n'Arte Dramático. Ente'l 2000 y el 2005 foi director y diseñador de "laOtra" la segunda canal de Telemadrid. Guerenabarrena va llevar les estayes de programación, producción, documentación d'audiencia de radio, televisión, periódicu y portal de Internet y tamién la dirección de los informativos.


El segundu nome de la llista ye'l de Manuel José Castrillo Álvarez asturianu de Xixón, onde nació nel añu 1969. Llicenciáu n'económiques y empresariales, entró nel sector trabayando en Televisión Local Xixón nel añu 1996, siendo hata agora xefe d'Alministración d'esta canal particular hasta la fecha. Na TVAS va llevar la dirección alministrativa, la económico- financiera y la estaya de recursos humanos.

Ún de los nomes de la directiva más conocíos pal públicu ye'l de Francisco Javier Asenjo, director dende l'añu 2002 de la emisión de la canal asturiana de Localia dende l'añu 2002. Nel añu 2001 presentó'l programa "La Mar de Bien" en TeleAsturias, y ente'l 1997 y el 2000 foi el director de Televisión Local Xixón y de les empreses la Ola Producciones y Asturiana de Exclusivas de Publicidad. Director de Radio Valladolid (Cadena SER) ente'l 96 y el 97, llevó tamién les emisiones de Cadena 40, Cadena Dial, M-80 y Cadena Rexonal de Castiella y Lleón. Ente'l 1991 y el 1996 dirixó Radio SER Xixón y M-80. Anque la so rellación col mundu de los medios remóntase hasta los años 70 y 80, cuando foi responsable de comunicación del Banco de Asturias. El so cargu na RTVAS va ser el de rellaciones corporatives colos grandes clientes y coles asociaciones del sector audiovisual. Asenjo va responsabilizase de llevar alantre la emisión de la radio, collaborando nel diseñu, execución y control de la programación y producción de programes tanto de la radio como de la televisión.

Flor Puente Rodríguez, natural de Tinéu y llicenciada en Ciencies de la Información pola Complutense, ye la única muyer del grupu. Redactora de programes de TV pa RTVE dende l'añu 1982, nel 1989 pasó a ser editora d'nformativos n'Antena 3, cargu que caltuvo hasta 1997. Flor Puente va encargase de la comunicación esterna y interna del Ente Públicu y los sos medios y de toles publicaciones, impreses y electróniques, siendo responsable del área de información de televisión, de radio y del periódicu electrónicu.

P'acabar, Daniel Álvarez Rodríguez (Mieres, 1967) ye llicenciáu en Derechu pola Universidá d'Uviéu. Xefe del Serviciu d'Alministración de Personal de la Dirección Xeneral de l'Alministración Pública ente'l 2002 y el 2003, foi númberu ún nes oposiciones pal ingresu nel Cuerpu Superior d'Alministradores del Principáu nel 1993. Nel Ente públicu van tocá-y les funciones de Secretaría Xeneral Técnica y les rellaciones cola Alministración Autonómica, amás de coordinar a los órganos directivos.