Comienza'l Festival Internacional de Cerveza Artesano de Llangréu

Catorce cerveceros presenten más de mediu centenar de variedaes nun certame que va contar con actuaciones de bandes como Dixebra, Escuela de Odio o Riot Propaganda.

El recintu de la Pinocoteca’l Conceyu Llangréu Eduardo Úrculo acueye la carpa onde van desendolcase, de baldre, toles actividaes del Festival Internacional de Cerveza Artesano de Llangréu. Amás de poder prebar decenes de tipos de diferentes de cerveza artesano, los asistentes van disfrutar de charres, alcuentros con productores y muncha música.

Caleya, Curuxera, Pepinum y Alkimia conformen la representación asturiana, a los que se sumen otres iniciatives artesanes de fuera del país como Dougall's, Naparbier, Basqueland Brewing Project, Garagart, El Oso y el Cuervo, Four Lions Brewery, Garriela, La Quince, Cr/Ak y Jopen. D'igual forma va haber espacios pa la gastronomía, con puestos de salchiches, comida tex mex o vexetariana, ente otros.

Conciertos

Otru platu fuertu del certame llangreanu son los conciertos, siendo la xornada estrella la prevista mañana. A les 21 hores un actu contra la violencia machista va preceder a l'actuación de Rabia Xabaz.

Escuela de Odio, que protagonicen una esposición d'homenaxe nel recintu, xubiránse al escenariu a les 22 hores, pa depués dar pasu a Dixebra, que tres tocar güei en Mieres na Folixa na Primavera faen doblete esta fin de selmana dientro del 'Tour 87-17' con motivu del so trentenu aniversariu. Van zarrar les actuaciones, a la 1, Riot Propaganda, el proyeutu musical que tien el so xerme na fusión de los castellanos Habeas Corpus y los valencianos Los Chikos del Maíz.

Esta nueche, mientres, van actuar El Tamar (22 hores), Vaudí Groove Brasil (23.30 hores), Always Drinking Marching Band (1 hora) y Gerar (2 hores). Mientres, otres munches formaciones musicales van amenizar el festival a lo llargo del mesmu.

El Festival Internacional de la Cerveza Artesano de Llangréu ta integraú dientro de la iniciativa Llangréu Cultural que vien desendolcándose nel conceyu dende'l martes y que va allargase hasta'l día 14. Calcando nesti enllaz pues consultar toles actividaes y horarios tanto del certame cerveceru como del propiu Llangréu Cultural.