Colunga convoca un certame de gaiteros n’alcordanza de Lliberdón

L'Asociación Cultural y de Festeyos "San Roque" de Lliberdón y l'Área de Cultura del Conceyu de Colunga asoleyaron la convocatoria de la sesta edición del Certame de Gaita Asturiana "Premiu Gaiteru Lliberdón" que fai alcordanza del famosu instrumentista Ramón García Tuero.

El Certame va celebrase en pueblu de Lliberdón el vienres 4 d'agostu del 2006 dende les 19:30h y namás ta convocáu qu'en modalidá individual, anque estremando en dos categoríes, una pa infantil, hasta 14 años, y otra d'adultos, de quince en p'alantre. En cualquier casu, la organización nun va almitir más de 12 concursantes en cada categoría, tando'l plazu d'inscripción abiertu hasta'l 21 de xunetu.

L'exerciciu pa tolos participantes va consistir na interpretación de dos temes llibres, que puen ser composiciones propies. Na categoría infantil los premios van ser de 120 euros y Troféu, 60 euros y troféu y 30 euros y troféu pa los trés primeros. Na categoría d'adultos el ganador va llevar una gaita asturiana artesanal del Taller del artesanu de Colunga Miguel A. Alonso Cachafeiro, mientres que'l segundu y tercer clasificaos van tener de premiu 150 y 100 euros y troféu pa dambos.

P'apuntase ye preciso abonar un depósitu de 5 euros pa Categoría Infantil y de 10 euros pa la d'Adultos na cuenta númberu 2048.0046.98.0300045978 de la oficina de CaxAstur de Colunga conseñando'l conceptu del ingresu y el nome y unviar a les señes de la Casa Municipal de Cultura de Colunga solicitú con nome y apellíos, edá, fecha de nacimientu, domiciliu y teléfonu de contactu más el xustificante de pagu.