Colunga celebra los Alcuentros cola Cultura Tradicional

Colunga va celebrar los X alcuentros cola cultura tradicional d'Asturies, una cita que va desarrollase del 14 al 24 de xunetu y que va inaugurase'l día 14 cola interpretación de la obra de teatru costumista y ambiente contemporáneu Les Cartes a les 22:30 de la nueche na escuela Braulio Vigón.

El vienres 15 nel paséu de la ilesia de Lastres, música folk y rock colos grupos Skanda y Lliberdón nun conciertu que va entamar a les 11 de la nueche. Los actos van siguir el martes 19 cola presentación del llibru de Xuan Pedrayes "Suncia la Bastaranga" a les 20:30 na casa de Cultura. El miércoles 20 tamién na casa de cultura y a la mesma hora va ser el músicu Daniel García de la Cuesta quien presente'l so llibru "Harpa y la so presencia n'Asturies" Xuan Pedrayes, arquitectu de formación, repite nestos alcuentros presentando'l xueves 21 la so obre "La ciudá de los horros" un llibru que reflexona sobre l'arquitectura tradicional y la modernidá.

Pa rematar los alcuentros, el vienres 22 toca'l grupu de música tradicional "Ibur" y los díes 23 y 24 la plaza cubierta de Colunga va acoyer un mercáu tradicional.