Colombia vota non al alcuerdu de paz del Gobiernu y les FARC

Con un 50,21 por cientu de los votos. La entruga del plebiscitu yera '¿Sofita vusté l'alcuerdu final pa la terminación del conflictu y la construcción d'una paz estable y duradera?'.

Los 'Alcuerdos de La Habana', roblaos el llunes pasáu ente'l Gobiernu de Colombia de Juan Manuel Santos y les Fuerzas Armadas Revolucionarias de Colombia-Ejército del Pueblo, nun superaron la consulta fecha al pueblu colombianu, que refugó los mesmos con un 50,21 por cientu de los votos. El sí, pela so parte, sumó un 49,78 por cientu, 53.894 votos menos sobre un total de 12.808.858. L'astención foi del 62,67 por cientu.

Los colombianos refuguen asina, por un estrechu marxe, un alcuerdu que pretendía poner fin a 52 años de conflictu. Dalgunos puntos del mesmu, como que los dirixentes de la guerrilla pudieran tener actividá política o que nun foran a la cárcel nel casu de reconocer l'autoría de los sos crímenes, nun convencieron a los votantes del 'Non' al documentu negociáu en Cuba.

El 'Non' ganó nes zones menos afeutaes pol conflictu

Ye de destacar que'l 'Sí' ganó nes zones más afeutaes pol conflictu, mentes que'l 'Non' fíxolo nes zones urbanes, más poblaes. Les FARC, tres conocer el resultáu, asoleyó un comunicáu nel que llamenten "fondamente que'l poder destructivu de los que semen odiu y rencor influyeren na opinión de la población colombiana", en referencia nidia al ex presidente Álvaro Uribe, y aseguren que mantienen la "voluntá de paz" y la so disposición a "usar sólamente la pallabra como arma de construcción hacia'l futuru".

Pela so parte, Santos reconció la victoria del 'Non' y afirmó que va siguir trayando pa "buscar la paz". Una delegación gubernamental va viaxar mañana a La Habana p'aconceyar colos delegaos de la guerrilla.