Colectivos de la izquierda preparen los 70 años de la Revolución d’ochobre de 1934.

Según va allegándose la señalada fecha del cabudañu de la revolución asturiana d'ochobre de 1934, de la que se cumplen esti añu los sos 70 años los distintos colectivos de la izquierda preparen actos n'alcordanza d'esti acontecimientu históricu, nel que, nun contestu en que les fuerces de la izquierda preparaben una acción contra l'ascensu de la derecha nel gobiernu, Asturies foi l'únicu llugar onde'l llevantamientu llegó a cuayar, convertiéndose nuna revolución qu'aguantó a lo llargo de quince díes y qu'acabó esfarraplada pol exércitu, entamando una terrible represión.

D'esta manera, si la otra selmana Darréu, la organización xuvenil venceyada a Andecha Astur, daba anuncia de la organización d'un conciertu conmemorativu na Sala Albéniz de Xixón pal próximu sábadu 8 d'ochobre, güei echó a andar la web www.ochobre34.com, plataforma dende la qu'Izquierda Xunida, el Partíu comunista d'Asturies, Bloque por Asturies y Lliberación como grupos políticos organicen, xunta l'Atenéu Obreru de Xixón, Foru Arte Ciudá, Sociedá Cultural Xixonesa y les fundaciones Juan Muñiz Zapico y Horacio Fernández Inguanzo, organicen una riestra d'actos conmemorativos de la revolución asturiana.

Uviéu, Xixón y les cuenques mineres, noyos onde se concentraron los socesos d'aquellos quince díes, van ser los escenarios de los actos previstos, qu'incluyen esposiciones como la que, baxo'l títulu "Suañu de Llibertá" organiza l'Asociación d'Es-presos y Represaliaos Políticos Antifranquistes. La proyección de la histórica película "Por el camino de Mieres" y otros documentales sobre ochobre del 34 cedíos pola Filmoteca Nacional va ser otru de los puntos más interesantes d'estes xornaes.

Respective a la composición de la plataforma qu'organiza estos actos, representantes del Conceyu Abiertu Pola Oficialidá esplicaron a Asturies.com que, anque'l logotipu del CAO apaez na web www.ochobre34.com, la plataforma que defende la oficialidá na reforma estatutaria nun tien que ver cola organización d'estos actos del 70 aniversariu. A lo llargo de la mañana, responsables del CAO contactaron coles organizaciones y entidaes responsables de la web www.ochobre34.com y del programa d'actos de celebración pa pidir esplicaciones pol error y pa reclamar la retirada del emblema del Conceyu Abiertu pola Oficialidá de la web