COFPA propón 30 midíes “pa la rexeneración de l’Alministración pública asturiana”

El Conceyu por otra Función Pública n’Asturies (COFPA) propón un total de 30 midíes “pa la rexeneración de l’alministración pública asturiana”. Éstes divídense en dos categoríes: l’emplegu públicu, y la organización y control de l’Alministración.
 
Aprovechando l’entamu de la campaña eleutoral, COFPA quier treslladar a los partíos políticos del país una serie de midíes y propuestes que “que son frutu de la esperiencia profesional de los miembros d'esta asociación y de los trabayos y aportaciones previos de coleutivos como'l Grupu d'espertos pa la reforma de l'Alministración Pública, d'organizaciones independientes contra la corrupción pública como Tresparencia Internacional, y de xuristes asturianos de reconocíu prestíu”. Dende esta organización entienden que “l'Alministración Pública asturiana atópase somorguiada nun esmolecedor procesu de dexeneración, resultáu d'una política de xestión del emplegu públicu que nos últimos años foi socavando les principales garantíes establecíes na Constitución pa desenvolver les funciones y los servicios públicos con imparcialidá”.
 
Por ello, COFPA lleva dos años trabayando y denunciando “esti grave deterioru democráticu” y saca a la lluz estes 30 propuestes que considera básiques pa la rexenaración de l’Alministración pública del país. “Ye imprescindible que'l próximu Gobiernu d'Asturies entame, cola urxencia que riquier el casu, midíes empobinaes a refacer l'Alministración pública asturiana, recuperando los valores públicos y los principios constitucionales que tienen de presidir l'actuación alministrativa”, aseguren nun comunicáu.
 
Les 30 midíes que propón esti coleutivu son les siguientes:
 
EMPLÉU PÚBLICU
 
1. Los miembros de los tribunales de selección van escoyese por sortéu. Los emplegaos públicos de llibre designación nun van poder formar parte de los órganos de selección.
Con esta midida quier garantizase la independencia de los órganos de selección del poder políticu, anguaño n'entredichu al acutar aquél la designación discrecional de la totalidá de los sos integrantes, cola posibilidá d'incluyir al personal d'enfotu - de llibre designación - ensin llimitación dalguna.
Trátase d'estender a la totalidá del empléu públicu un sistema que yá vien aplicándose nel ámbitu sectorial de la educación.
 
2. Los funcionarios públicos que realicen funciones de preparación d'oposiciones tendrán de solicitar la reconocencia previa de la compatibilidá pa esta xera. En nengún casu va autorizase a aquellos que desempeñen funciones rellacionaes directamente cola xestión de la Función Pública asturiana o que les desenvolvieren nos diez años anteriores a la solicitú.
Con esta midida va evitáse la esistencia de conflictos d'intereses o informaciones privilexaes na preparación de pruebes selectives pal accesu al empléu públicu.
 
3. El nomamientu y cese del personal eventual d'enfotu de los altos cargos, y les sos retribuciones, van publicáse nel boletín oficial.
Trátase con ello d'esaniciar el oscurantismu y total opacidá qu'anguaño esiste en relación con estos empleaos públicos, evitando los riesgos de tráficu d'influencies que se xeneren con esta situación.
 
4. Los nomamientos provisionales en comisión de servicios van faese puramente por razones d'estraordinaria y urxente necesidá, debidamente motivaes nel resolvimientu de nomamientu. Los puestos asina ocupaos van convocase en concursu de méritos nel plazu máximu de tres meses.
La finalidá d'esta midida ye esaniciar les situaciones de provisionalidad permanente que se fueron xeneralizando y que condicionen decisivamente la resultancia final de los concursos de méritos a favor de los funcionarios primeramente agraciaos cola comisión de servicios.
 
5. El nomamientu en comisión de servicios va esixir la tramitación d'un procedimientu previu y sumariu col fin d'escoyer al funcionariu, nel que se garantice la llibre concurrencia de los interesaos, resolviéndose con respetu a los principios de publicidá, igualdá, méritu y capacidá.
Quier evitáse que los nomamientos provisionales se faigan en razón a les influencies personales, polítiques, sindicales etc.
 
6. Los procedimientos de selección y de promoción profesional nun van incluyir, en nengún casu, pruebes suxetives o que beneficien de forma decisiva a determinaos candidatos, como les entrevistes o la esixencia de memories sobre les funciones específiques d'un puestu de trabayu primeramente ocupáu por un aspirante a la plaza.
Con esta midida van desterrase práctiques y pruebes de selección y promoción incompatibles cola necesaria oxetividá que tien de presidir estos procesos o que supongan un sesgu determinante escontra dellos aspirantes, contrariu a la igualdá.
 
7. Los nomamientos pol sistema de llibre designación van ser escepcionales y pa puestos nos que desempeñen funciones que tengan un elementu d'enfotu nel funcionariu escoyíu. En nengún casu va ser d'aplicación a puestos de trabayu que desempeñen funciones rellacionaes cola selección y promoción del personal, cola contratación pública, cola intervención y fiscalización del gastu, cola representación y defensa xurídica de l'alministración, col exerciciu de la potestá sancionadora y d'inspección y coles materies del urbanismu y de la protección del mediu ambiente y de los consumidores.
La finalidá d'esta midida ye llindar el sistema de promoción de la llibre designación a los supuestos escepcionales y estraordinarios, primeramente xustificaos, nos que pola naturaleza de les funciones desempeñaes, resulte xustificada una designación basada nel enfotu nel funcionariu escoyíu; evitando, con ello, el fenómenu d'hipertrofia d'esti tipu de puestos que güei se da na Alministración asturiana y, sía que non, escluyéndolo naquelles materies y funciones na que resulte precisu estremar les condiciones d'imparcialidá y neutralidá política de los emplegaos públicos que les desempeñen.
 
8. Les retribuciones en conceutu de gratificaciones estraordinaries tendrán de publicase nel boletín oficial, con indicación de la identidá del receptor, puestu que ocupa ya importe recibíu.
Tratase d'introducir tresparencia na concesión d'esti tipu de percepciones retributivas, nes qu'esiste un altu componente de discrecionalidad, con cuenta d'esaniciar los riesgos de que s'utilicen con fines distintos a los legalmente establecíos, que namás pueden ser la prestación escepcional de servicios estraordinarios debidamente acreditaos y xustificaos.
 
9. La tabla de retribuciones va responder a principios de cohesión social y xusticia distributiva, de tal manera que nun esistan diferencies salariales desproporcionaes ente los distintos grupos d'emplegaos públicos.
Tratase d'evitar la situación de clasismu salarial, anguaño esistente, que privilexa de forma escesiva y desproporcionada la pertenencia a grupos y cuerpos de titulaos cimeros o medios, o'l desempeñu de cargos o puestos de xefatura cuando la so especial responsabilidá mengua nel organigrama xerárquicu o resulta manifiestamente inxustificada. L'enclín pola homoxeinización salarial y pol amenorgamientu de les diferencies nel abanicu de sueldos va contribuyir, entendemos, a alzar la motivación de los trabayadores, redundando nuna meyora na calidá de la prestación de los servicios públicos. Al empar, la percepción d'un salariu abondu, que se considere xustu pol conxuntu de trabayadores, va contribuyir a amenorgar los riesgos de comportamientos corruptos.
 
10. La creación, cambéu o supresión de puestos de trabayu va esixir informes técnicos motivaos que xustifiquen, dende'l puntu de vista esclusivu de la eficacia y eficiencia de los servicios públicos, la necesidá de cambeos nes relaciones de puestos de trabayu.
La finalidá d'esta propuesta ye terminar cola práctica corriente de los cambeos de les relaciones de puestos de trabayu realizaes por razones de índole personal o puramente presupuestaria, al marxe de les necesidaes reales de los servicios públicos afectaos.
 
11. Les interinidaes van llindase puramente a los casos espresamente xustificaos de necesidá y urxencia, incorporando obligatoriamente los puestos vacantes na primer ufierta d'empléu públicu.
La midida val pa esaniciar les situaciones d'interinidá siguida, que precarizan l'empléu públicu, torguen l'accesu a los puestos vacantes en condiciones d'igualdá, méritu y capacidá y afecten a la calidá de los servicios públicos emprestaos a los ciudadanos.
 
12. L'accesu a los puestos de trabayu dependientes d'empreses públiques y organismos públicos de derechu priváu va realizase por aciu de procedimientos que garanticen los principios de publicidá, igualdá, méritu y capacidá. Les pruebes selectives van ser xulgaes por tribunales independientes, nomaos por sortéu ente funcionarios públicos.
Preténdese con ello poner fin a les práctiques fraudulentes d'entrada nestos organismos al marxe de los principios constitucionales d'accesu al empléu públicu, coles relaciones de naturaleza clientelar que se deriven de tales práctiques.
 
13. Los sistemes d'evaluación del desempeñu de los emplegaos públicos van llevase a cabu conforme a métodos y criterios oxetivos ya imparciales, siguiendo procedimientos tresparentes y cola participación activa de los trabayadores. Les evaluaciones nun van tener nunca finalidá represiva, polo que nun tendrán de confundise en nengún casu coles mires de los espedientes disciplinarios, nin condicionar la percepción de partes sustanciales del salariu. Los funcionarios de llibre designación nun van poder realizar informes de valoración del desempeñu llaboral de los emplegaos públicos, nin formar parte de les comisiones técniques de valoración. Dientro d'estos procedimientos incluyiráse la evaluación de los emplegaos públicos que desempeñen puestos de xefatura per parte de los trabayadores dependientes d'esos órganos alministrativos, conforme a los principios señalaos.
Con esta midida preténdese que les evaluaciones individuales del desempeñu s´acuten a los únicos fines que pueden faceles compatibles coles garantíes constitucionales d'imparcialidá: ameyorar la eficacia y l'eficiencia nel desenvolvimientu del trabayu de los emplegaos públicos, detectando los aspeutos del trabayu individual y colectivu que resulten ameyorables por aciu de la formación, la reorganización de los servicios o la reasignación de funciones.
 
14. Va esixise obligatoriamente responsabilidá personal a los políticos y funcionarios qu'intervengan de forma maldosa o desdexosa nos procesos de contratación fraudulenta de personal, particularmente nos casos d'encadenamientu socesivu de contratos temporales o de cesión irregular de trabayadores, ensin perxuiciu de les responsabilidaes penales nes que pudieren incurrir.
Tratase d'esaniciar les situaciones d'impunidá qu'acompañen de normal a esti tipu de comportamientos irregulares.
 
15. Va prohibise l'usu de fórmules y convenios que tapen el “prestamismu” de trabayadores d'empreses públiques a l'Alministración territorial.
Con esta midida erradicaranse les práctiques ilícites, pero relativamente frecuentes, de cesión de trabayadores venceyaos a empreses públiques a l'Alministración territorial autonómica, pa llevar a cabu trabayos que correspuenden al personal de plantiya d'aquélla, evitando de forma fraudulenta l'ampliación de la ufierta d'empléu públicu al traviés de les preceptives convocatories públiques.
 
16. Va suprimise l'afitamientu del llamáu complementu d'altu cargu, dirixíu a gratificar de forma permanente a los funcionarios qu'ocupen dos años puestos políticos.
Esti complementu que, na actualidá, consolídase tres el cese nel puestu d'altu cargu políticu, constitúi un privilexu salarial p'aquellos emplegaos públicos que desempeñen funciones de naturaleza política, pos escarez de cualquier xustificación oxetiva o razonable, más allá de premiar esa actuación partidista.
 
 
ORGANIZACIÓN Y CONTROL DE L'ACTUACIÓN ALMINISTRATIVA
 
1. La Inspección Xeneral de Servicios y l'Intervención Xeneral van entamase como órganos independientes, dirixíos por funcionarios públicos designaos pola Xunta Xeneral del Principáu por mayoría cualificada, ante la que van rindir cuentes. Caún d'estos Órganos va ellaborar una memoria añal que tendrá de publicase nel boletín oficial.
Esta midida va empobinada a qu'estos dos órganos alministrativos, de vital importancia pal control de llegalidá ya inspección de l'actividá alministrativa, se asitien al marxe de les directrices polítiques del Gobiernu, como asocede na actualidá, asegurando les condiciones d'independencia imprescindibles p'actuar con imparcialidá y neutralidá política.
 
2. El resolvimientu de los recursos alministrativos va encamentase a órganos independientes d'aquellos que dictaron los actos alministrativos recurríos. Los funcionarios qu'integren l'órganu o órganos alministrativos encargaos del resolvimientu de los recursos van tener plena independencia funcional y van aportar a los sos puestos por concursu de méritos.
L'oxetivu d'esta midida ye poner fin a la inoperancia qu'anguaño tienen los recursos alministrativos, al ser resueltos pol mesmu órganu del que emana l'actu impugnáu, de manera que na práctica constitúin una torga pal accesu a la xusticia contenciosu – alministrativa.
 
3. La Inspección Xeneral de Servicios va desenvolver un Plan de control d'Incompatibilidaes dirixíu a xixilar el cumplimientu de les obligaciones derivaes de la reconocencia de la situación d'incompatibilidá de los emplegaos públicos.
Con esta midida va aseguráse la efectividá de los oxetivos del réxime xurídicu de les incompatibilidaes pa determinaos puestos de trabayu, fundamentalmente, evitar los conflictos d'intereses que se produciríen si les funciones públiques pudieren simultanease col desempeñu de segundes actividaes nel sector priváu.
 
4. Los emplegaos públicos que s'atopen colexaos en dalgún colexu profesional y resulten nomaos nun puestu de trabayu configuráu col complementu d'incompatibilidá, tendrán de presentar ante la Inspección de Servicios, nel plazu máximu d'un mes dende la fecha del nomamientu, un certificáu de baxa nel colexu respectivu.
La finalidá d'esta propuesta ye evitar los riesgos acomuñaos al desempeñu d'actividaes privaes prohibíes, particularmente en puestos singularizados y sobremanera, nos d'especial responsabilidá y enfotu.
 
5. El Rexistru de Contratos Públicos va ser d'accesu llibre al traviés de la web institucional del Principáu d'Asturies. Nél tendrán d'inscribise obligatoriamente la totalidá de los contratos que celebra l'Alministración, incluyíos los contratos menores, con indicación del oxetu del contratu, la identidá de la empresa axudicataria y la fecha y el preciu d'axudicación. Nel casu de los contratos axustaos ensin publicidá, va ser obligatoria incluyir la identidá de les empreses consultaes y l'importe de les sos ufiertes.
Tratase con ello d'otorgar la máxima tresparencia a la contratación pública, facilitando información permanente y de llibre accesu a tolos ciudadanos.
 
6. La Inspección Xeneral de Servicios y l'Intervención Xeneral van desenvolver conxuntamente un Plan de control de la execución de la contratación pública, por aciu d´inspecciones programaes.
El fin d'esta midida ye asegurar el rectu cumplimientu de los contratos, comprobando de manera sistemática que les obres, mobiliariu, actividaes y servicios efectivamente emprestaos polos contratistes tan d´alcuerdu a lo axustao nos contratos. Esti control per mediu d'inspectores ayenos a les unidaes alministratives de les que dependen les prestaciones contractuales, va dexar alvertir los posibles defectos, incumplimientos o irregularidaes, adoptando con rapidez y eficacia les midíes correctores pertinentes.
 
7. Van reforzase los Servicios de control y supervisión de proyectos d'obres, col fin garantizar la calidá de los mesmos y l'oxetividá de les partíes presupuestaes. Con esi envís, va constituyise un Órganu Técnicu Colexáu de supervisión de proyectos, de calter independiente, que tendrá de validar los informes emitíos polos Servicios técnicos de les distintes Conseyeríes.
La supervisión y control de los proyectos técnicos ye “conditio sine qua non” pa evitar la práctica tan abondosa de los sobrecostos y de modificaos de los proyectos iniciales, que tracamundia los principios d'igualdá y llibre concurrencia de les contrataciones y desequilibra la xestión ordenada del gastu públicu presupuestáu.
 
8. L'usu de mecanismos de xestión contractual de servicios públicos – empreses públiques interpuestes, concesiones o figures similares - va esixir la ellaboración d'un informe refechu previu sobre'l costu económicu de les distintes alternatives, comparando'l costu económicu que supondría la prestación directa del serviciu col que resultaría de la xestión privatizada.
L'oxetivu d'esta propuesta ye evitar les decisiones sobre la xestión privada de servicios públicos en base a xuicios infundaos o comenenciudos – amazcaramientu de delda pública, presiones de grupos económicos etc. -, sobre la mayor eficiencia y menores costos de dicha xestión, non sofitaos n'informes oxetivos previos sobre'l costu real de les distintes alternatives de xestión.
 
9. La contratación d'asistencies técniques, consultoríes y servicios similares deber de dir precedida d'informes oxetivos nos que se xustifique motivadamente la inesistencia o insuficiencia de medios personales na Alministración pa emprestar dichos servicios o, nel so casu, la improcedencia de la medría de la plantiya pública.
Tratase d'evitar la contratación innecesaria de servicios privaos, en munches ocasiones, por aciu de contratos menores o axustaos ensin publicidá, cuando l'Alministración dispón de personal abondo cualificáu pa llevalos cabu.
 
10. Va prohibise espresamente que'l personal de les empreses que desenvuelvan asistencies técniques, consultoríes y servicios similares, ocupe de forma habitual y permanente dependencies de l'Alministración.
Con ello preténdese torgar situaciones de tracamundiu de funciones, que pueden favorecer l'accesu a información reservada en beneficiu priváu. Trátase d'evitar, tamién, el riesgu d'ingresu del personal d'estes empreses n´Alministración Pública pol usu fraudulentu o irregular del mesmu.
 
11. Van enllantase mecanismos que sofiten la denuncia de conductes y casos de corrupción con protección pa los denunciantes.
Preténdese con ello facilitar la collaboración de los emplegaos públicos na detección de comportamientos irregulares na Alministración, ensin medrana a represalies de nengún tipu, especialmente les que puedan condicionar la carrera profesional del denunciante.
 
12. Va amenorgase'l númberu y competencies de les empreses y entes públicos sometíos al derechu priváu.
Con esta propuesta échase la recuarta al conocíu fenómenu de la fuxida del Derechu alministrativu por aciu esti tipu d'entes, en munchos casos pa refugar los procedimientos y garantíes en materia de selección de personal, contratación, fiscalización del gastu y control de la delda pública.
 
13. La Inspección Xeneral de Servicios y l'Intervención Xeneral van desenvolver un Plan de control del cumplimientu de los fines y oxetivos de les subvenciones.
La finalidá d'esta midida ye asegurar que les actividaes subvencionaes cumplen coles condiciones y requisitos impuestos nos resolvimientos de concesión, evitando cualquier tipu de fraudes ya impulsando, cuando procedan, los procedimientos de revocación y reintegro de les cantidaes concedíes.
 
14. Les sesiones de los Organismos públicos colexaos con competencies en materies como l'urbanismu, el mediu ambiente o'l patrimoniu históricu, van ser públiques. Les actes nes que se recueyan los alcuerdos van publicase nel boletín oficial.
Con esta midida preténdese asegurar el cumplimientu de les finalidaes que xustifiquen la esistencia d'estos Organismos, en concretu, la publicidá, tresparencia y participación ciudadana na xestión de materies especialmente sensibles pa los intereses colectivos de la sociedá.