COAG pide ayudes pa la ganadería de monte

El sindicatu agrícola COAG-Asturies pidió-yos ayeri a les Alministraciones que s'enfotaren en caltener l'actividá agraria en zones de monte y desfavorecíes pa torgar l'abandonu de los pueblos y combatir l'éxodu rural hacia los grandes núcleos urbanos. Como midíes pa ser a ello, COAG propón en primer llugar que se siga aplicando la Indemnización Compensatoria, que beneficia a los ganaderos y agricultores que trabayen personalmente la tierra y que tan asitiaos nel mediu rural. Con too y con ello, el sindicatu agrícola ve qu'ello nun ye abondo, y pide que'l Gobiernu actualice los importes d'esta ayuda a la media de la UE, y ye que, anque estes ayudes tienen financiación de los fondos comunitarios FEOGA, España ye'l miembru de la UE que da los importes más baxos n'indemnización compensatoria, reservando pa ello 75 millones d'euros. COAG pidió que s'aumentare esi fondu hasta los 120 millones, y diz qu'esta xuba ye asumible pola alministración, que pue aprovechar pa ello los fondos lliberaos pola aplicación de la modulación de les ayudas directes de la Reforma Intermedia de la PAC, ayudaes que s'empobinen, precisamente, a los agricultores y ganaderos que trabayen en llugares más despoblaos y con mayores torgues orográfiques, con un criteriu de conservación del paisaxe.

El sindicatu agrariu esplicó que la incidencia de la indemnización compensatoria sobre la renta de los agricultores ye mui pequeña y qu'amás nun repercute sobre los más afectaos en cuantes que nun s'aplica con criterios d'estremar ente les distintes rexones y condiciones físiques en que viven y trabayen los beneficiarios. Los datos concretos sobre la crisis del sector de ganadería de monte n'Asturies son yá alarmantes, y asina COAG apurre una tabla de datos qu'espeya como nun añu, ente 2.002 y 2.003, les solicitúes d'indemnización baxaron de 7.335 a 5.185. El sindicatu ve que la situación ye crítica y pide una actuación urxente.