COAG denuncia'l pieslle de 700 ganaderíes en seyes meses

El sindicatu agrícola COAG-Asturies declaró ayeri que de va seyes meses p'acá pesallaron 700 esplotaciones ganaderes n'Asturies.

Según los datos qu'apurrió COAG en marzu había 5.462 esplotaciones de ganáu de lleche, cantidá que baxó l'ún de setiembre a 5.022. A esi descensu, habría que amestá-y les 314 ganaderíes pendientes d'acoyese al plan d'abandonu de la producción y que pidieron el cese ente xunetu y setiembre. COAG diz qu'esta baxada del númberu de ganaderíes espeya la falta de rentabilidá nel sector, nel que'l llitru de lleche tien un coste de producción sobre les 45-46 pesetes, mientres que'l preciu de vienda nun garantiza un marxe de beneficiu. En rellación con esta falta de rentabilidá, Marino Fernández, secretariu de COAG, entiende que ta importándose lleche de fuera pa inundar el mercáu y asina caltener l'ipc , y chóca-y enforma que nel mercáu haya unes marques de lleche a a 41 céntimos y otres a 88. estes diferiencie de precios respuenden a diferiencies de calidá del productu que'l consumidor nun ye a estremar, y COAG pide en consecuencia que'l lleche barato, que va mecío con aditivos, s'etiquete distinto de lo que ye natural.

El clima de crisis y la concencia de qu'hai qu'abandonar la producción nel sector ganaderu ye tan grave que fontes de COAG esplicaron a Asturies.com qu'estos díes, en que ta abiertu'l plazu de compra de cuota, nun se ven nes oficines de la conseyería les coles de ganaderos interesaos en mercar derechos de producción que solíen vese otros años, lo que ye bona muestra del declive del sector.