Cine, llibros, recital y ruta nes Xornaes de la Memoria Histórica en L’Infiestu

L’asociación cultural Les Ablanes entama esta segunda edición.

Esti fin de selmana l'asociación cultural piloñesa Les Ablanes organiza por segundu añu les Xornaes de la Memoria Histórica, que tienen por títulu “Desenterrando la Historia. Memoria, represión y llucha n’Asturies del sieglu XX”. Toles actividaes son de baldre y hasta completar l’aforu, anque va poder collaborase cola asociación mercando productos de merchandising.

El sábadu 2, a les 10:30 la mañana, la casa cultura de L’Infiestu va acoyer la proyeición d'A golpe de tacón, un curtiumetraxe dirixíu por Amanda Castro qu’amuesa los acontecimientos venceyaos a la fuelga minera de 1962. Darréu, Anita Sirgo, protagonista d'esta fuelga y de la película, nos va contar el so rellatu. A les 12:30 va facese la presentación del llibru Mi infancia en el franquismo. Tiraña, Asturies, 1938. Ye d’un diariu escritu por Enesida García Suárez onde da a conocer la so experiencia demientres los años de dictadura. Intervendrán nesta segunda ponencia, Yerba Segura Suárez, autora del epílogu, y Mª Isabel García García, fia d’Enesida.

El mesmu día, a les 18:00 de la tarde, y nel mesmu sitiu, va presentase la novela gráfica Cumbres en pie de Guerra. Sobre la batalla del Mazucu, cola presencia del autor, Guillermo Menéndez Quirós, que va falar del so procesu creativu y de la documentación a la hora d'ellaborar la so obra. Y a les 20:00, pa finar la xornada del sábadu, na Cervecería La Traviesa va haber un recital de poesía a cargu d'Antonio Díez y un conciertu a cargu d’Ún de Grao.

Les xornaes finen el domingu 3 d’abril, con una ruta guiada a la Fuexa Común de La Reboria. Va ser a les 12:30 de la mañana, onde l'arqueóloga Irene Faza va falar sobre les buelgues que la guerra y la represión dexaron nel paisaxe, y l'historiador Jose Antonio Longo va facer un percorríu históricu del llugar. P’acabar la ruta, el cantante piloñés de canción asturiana Ismael Tomás, interpretará dalguna tonada na propia foya.