Cinco asociaciones soliciten a les Cortes de Castilla y Lleón proteición pal idioma y presencia na escuela

|

Coleutivos de defensa del asturlleonés reclamaron a les Cortes de Castilla y Lleón, al traviés d’un escritu, el cumplimientu del artículu 5.2 del Estatutu d’Autonomía. Piden proteición pal idioma y la so presencia na escuela.

Faceira (Lleón), Furmientu (Zamora), El Teixu (Asturies, Lleón, Zamora y Bergancia) Documentación y Estudio de El Rebollar (Salamanca) y La Caleya (Estorga) son les cinco asociaciones que realicen esti pidimientu a les Cortes pa que cumpla col estatutu, “desenvolviendo una llei y una política llingüística que garantan la protección del llionés y la súa enseñanza”. “Por más que l’Estatutu d’Autonomía de Castiella y Llión disponga que’l ‘llionés va ser obxectu de protección específica’ y que la súa ‘protección, usu y promoción van ser obxectu de regulación’, las instituciones de la comunidá autónoma mantuvienon una inactividá absoluta en materia llingüística”, denuncien estos coleutivos, que recuerden que la situación actual con respeuto al idioma “vulnera la Constitución, l’Estatutu y la Carta Europea de las Llinguas Rexonales ou Minoritarias del Conseyu d’Europa”.

Nel testu entregáu, les cinco asociaciones espliquen de manera detallada los continuos incumplimientos que fai’l Gobiernu de Castilla y Lleón no que respeuta al idioma y recuerda-y la política discriminatoria que desendolca, promocionando’l gallegu y l’eusquera –llingua non protexida nel Estatutu d’Autonomía– mientres escaez la llingua propia d’una gran parte del territoriu autonómicu.

Contador Estadistiques