Cientos de visitantes acudieron a Morcín al IV Concursu-Esposición de Gochu Asturcelta

El IV Concursu-Esposición de Gochu Asturcelta que tuvo llugar el sábadu en Santolaya foi un ésitu de públicu. Cientos de persones averáronse al recintu ferial pa ver a los meyores exemplares d’esta raza autóctona en procesu de recuperación.
 
Un total de 130 exemplares de 16 ganaderíes partciparon nesta cuarta edición del concursu entamáu pola Asociación de Criadores del Gochu Asturcelta (ACGA), que repartía premios en 6 categoríes, con 150 euros pal ganador, 90 pal segundu y 60 pal terceru. El gallardón al meyor berrón marchó pa Siero, en concreto pa la ganadería de Juan José Pañeda; el de meyor gocha foi pa un exemplar de la mierense Marta Elena Díez; el de meyor llabascu (machu menor de siete meses), pa la llocal Evangelina Álvarez; el de meyor llabasca (fema menor de siete meses), pa la uviedina Lucía Álvarez; el de meyor rebañu, pal moscón José Antonio López; y el de meyor gocha con gochinos, pa la yerbata María del Rosario Sánchez. L’encargáu d’evaluar los animales que participaben nel concursu foi Félix Goyache, responsable del programa de meyora xenética del Serida.
 
El certame tuvo presidíu pol conseyeru d’Agroganadería y Recursos Autóctonos, Albano Longo, que se encargó de repartir los premios xunto col alcalde de Morcín, Jesús Álvarez; los conceyales Daniel Barja, Juan Carlos Fernández, Manuel Mallada, Miguel Figueras, Nuria González y Blanca Martínez; el presidente d’ACGA, José Manuel Iglesias; y la presidenta de la Asociación de Muyeres So la Malena, María Prieto. “Cola organización d’esti certame pretendemos difundir la raza de gochu asturcelta, dala a conocer a tolos asturianos, que sepan que tenemos una raza de gochu autóctona” esplicaba Iglesias tres el certame. En total, Asturies tien 120 ganaderos censaos que trabayen na crianza d’esta raza tovía en peligru de desaniciu pese a que cada vez hai más exemplares. Anguaño yá se supera la cifra 2.000 gochos asturceltes nel país.
 
Otru de los alicientes que tuvo la xornada del sábadu en Santolaya foi’l repartu de más de 100 quilos de picadillu con tortos de maíz gracies al trabayu de les muyeres de So la Malena, una delicia que prestó enforma a los visitantes. De forma paralela, celebróse el I Concursu de Picadillu de Gochu Asturcelta, nel que tomaron parte cinco carniceríes: El Rosal de Grau, Colunga d’Oviedo, Delfina d’Avilés, Gancedo de Tinéu y Hermóxenes. Una mesma persona encargóse d’ellaborar el picadillu de la mesma manera pa que’l xuráu prebase y diera un veredictu sobre cuál yera’l meyor. Al final, el primer premiu viaxó a Uviéu, polo qu’El Rosal va encargase l’añu qu’entra de facilitar esti productu pa repartir de baldre ente los asistentes al certame.
 
Por último, ACGA entregó’l gallardón ‘Amigos del gochu’, dedicáu a aquelles persones y entidaes que collaboraren na recuperación de la raza de gochu asturcelta. Nesta primer edición los premiaos foron Ramón Celorio, conocíu restaurador asturianu, y el programa de la TPA ‘Conexión Asturias’.
 

I Folixa del Gochín a la Estaca
 
El domingu completóse l’actividá dedicada al gochu del país cola celebración de la I Folixa del Gochín a la Estaca nel recintu ferial de Morcín. En total se preparon 14 exemplares pa 500 comensales, que se fixeron a la forma tradicional con maderos de carbayu. Pa completar la xinta, les muyeres de So la Malena prepararon dellos postres caseros. Iglesias afirmó que l’oxetivu d’esti tipu d’actividaes, que dao l’ésitu van repetise otros años, ye “dar a conocer al gochu”, y pa ello la meyor manera “ye saborgándolu, que la xente conoza les sos propiedaes escelentes nel paladar”.


Na semeya, el sierense Juan José Pañeda col exemplar ganador del premiu al meyor berrón.