Cientos de truches muertes tres un vertíu de CAPSA nel ríu Nora

La Coordinadora Ecoloxista denunció ante la Confederación Hidrográfica del Cantábricu y el Gobiernu d’Asturies un vertíu nuevu nel ríu Nora. Según señalen los ecoloxistes, pudieron vese cientos de truches muertes nun tramu de cuatro quilómetros.
 
El vertíu al Ríu Nora tuvo llugar’l sábadu, a l’altura de Granda, “procedente de les instalaciones de Corporación Alimentaria Peñasanta (CAPSA) na so factoría de Siero”, según afirmen dende la Coordinadora Ecoloxista d'Asturies. Pel ríu pudieron vese manches blanques provocaes por un productu químicu tóxicu que los ecoloxistes responsabilicen namái a esta empresa por alcontrase nel so canal qu’acaba nel Nora, ríu percastigáu que taba recuperándose de los vertíos numberosos que sufría y nel que se vien realizando una suelta continua d’alevines que por episodios como esti nun consoliden la recuperación de les especies”.
 
Los ecoloxistes señalaron que pudieron apreciase cientos de truches muertes por mor del vertíu nun tramu de cuatro quilómetros, anque nun supieron cuantificar el dañu que foi capaz de producir esti productu químicu tóxicu na fauna y flora del Nora. La Coordinadora Ecoloxista considera inadmisible esta actitú de la empresa asturiana y reclama a la Confederación y al Gobiernu “una investigación decidida” sobre esti asuntu y que, “amás de sancionar a los responsables, se-yos esixa a CAPSA les midíes afayaíces pa evitar vertíos nuevos que nun pueden almitise nes sos instalaciones modernes”.