Cientos d’asturianos indignaos pola situación actual mantienen les protestes n'Uviéu y en Xixón

La manifestación del domingu n’Uviéu convocada pola plataforma ciudadana ‘Democracia real yá’ convirtióse nel xerme d’un movimientu tovía mayor. Más de 200 persones axuntáronse'l martes en Xixón y Uvíeu y dalgunes fixeron nueche n’abertal.
 
La indignación pola situación actual, l’actitú de la clase política y el poder qu’otorga l’Estáu a la banca llevó a una ciudadanía que paecía dormida a espertar y a organizase contra’l sistema actual. ‘Democracia real yá’ foi la impulsora d’esti movimientu con una manifestación convocada en mediu centenar de ciudaes del tol Estáu y otres plataformes similares y ciudadanos anónimos decidieron dar continuidá a un movimientu que va a más y que paez que yá naide va poder aparar. Ayeri, n’Uviéu y en Xixón, axuntáronse más de 200 persones en solidaridá coles persones que la Policía desallugó de manera brutal de la madrilana Puerta del Sol y dalgunes decidieron pasar la nueche n’abertal en mou de protesta pese al orbayu.
 
La Escandalera uviedina ta siendo l’epicentru de les movilizaciones n’Uviéu y ayeri fixeron nueche ehí cerca de 30 persones. En Xixón, mentes, el puntu de reunión ye la Plaza Mayor, onde durmieron n’abertal 16 persones. Güei, Asturies.com tuvo presente frente a la Casa Conceyu xixonesa a la hora de la xinta y unes venti persones manteníense nel llugar mentes establecíen turnos pa nun abandonar una  protesta a la que van siguir sumándose persones a lo llargo del día. Los presentes aseguraron pasar bien la nueche y dixeron nun tener problemes cola Policía, que taba asitiada a l’altura del Hotel Asturias.
 
L’oxetivu de los ciudadanos que tán sofitando la protesta estos díes ye’l de crear grupos de trabayu con vistes a una asamblea que va celebrase’l vienres –con horariu y llugar tovía por confirmar– na que van tomase decisiones sobre qué aiciones poner en marcha de cara’l futuru porque, pese a que dalgunos políticos señalen col deu estos movimientos como axitadores de cara a les eleiciones del 22 de mayu, l’oxetivu ye continuar con ello depués del domingu hasta que camuden les coses. Pa güei ta prevista una asamblea nueva a les 20 hores nes dos ciudaes a la que tán convidaos tolos ciudadanos indignaos cola idega de difundir el mensaxe y axuntar al mayor númberu de xente posible. Pela nueche, y hasta’l domingu, va mantenese l’acampada na Escandalera y na Plaza Mayor con sacos de dormir n’abertal, puesto que nun ta permitíu l’usu de tiendes de campaña.
 
“Per delles hores debatióse sobre la clase política corrupta, sobre’l llacayismu de los políticos colos mercaos financieros y sobre decenes de cuestiones que les plataformes ciudadanes tán recoyendo: inxusta llei eleutoral, recortes sociales, independencia del poder xudicial, partitocracia, etc.”, señalaron les persones que fixeron nueche ayeri nun nota de prensa unviada a los medios. Estos ciudadanos quieren dexar claro, ante les insinuaciones de dalgunos políticos, que “en nengún momentu pidimos el votu pa nengún partíu. Tampoco l’astención como dalgunos quixeron pervertir el nuesu mensaxe. Apelamos al espíritu críticu de la ciudadanía, pa que tome conciencia de los problemas que surden del sistema actual y de la pinza perversa que’l PSOE y PP exercen sobre’l sistema”.