Cien persones permanecíen na Plaza Mayor de Xixón a medianueche

Les movilizaciones contra’l sistema actual siguen medrando. Les asamblees celebraes en Xixón y n’Uviéu axuntaron a unes 300 persones y cerca d’un centenar permanecía na Plaza Mayor a medianueche. Munches diben pasar la nueche.
 
El mensaxe de les movilizaciones contra la situación actual, l’actitú de la clase política y el poder qu’otorga l’Estáu a la banca ta espandiéndose de forma rápida al traviés del ‘boca a boca’ y de les redes sociales, como ta comprobándose nes concentraciones de Xixón y Uvién que se mantienen dende la tarde del martes. Esti miércoles celebróse una asamblea nueva na que la xente comentó la so opinión megáfonu en mano y na que continuóse col reparte de tarees y l’establecimientu de turnos pa qu’haya xente nes protestes convocaes na Plaza Mayor xixonesa y na Escandalera les 24 hores del día. Inclusive, el movimientu paez que salta p’Avilés y que la xente de la zona ta organizándose pa celebrar una asamblea’l xueves.
 
En Xixón, a medianueche, permanecíen cerca de 100 indiganos concentraos frente a la Casa Conceyu, tanto nel centru de la plaza como sentaos nos bordillos de los soportales. Munchos d’ellos, preparaos con sacos de dormir pa pasar la nueche n’abertal. Los presentes teníen dellos portátiles –y un proyeutor– qu’utilizaben pa informase de lo que taba asocediendo n’otros puntos del Estáu onde tamién ta siguiéndose esta movilización. D’igual forma, contaben con comida abondo que la xente traxo pa compartir colos manifestantes. N’Uviéu a la mesma hora, un bon númberu de persones permanecía n’Escandalera col mesmu oxetivu. El xueves, a les 20 hores, ta convocada otra asamblea nueva nes dos ciudaes.
 
Madrid, con más de mil persones pasando la nueche na Puerta del Sol pese a la lluvia que ta cayendo esta madrugada –pel día, miles de persones acudieron a la llamada de protesta–, ta siendo’l centru de toles miraes del mundu occidental por un movimientu ensin precedentes en democracia nel Estáu español. Tolos medios internacionales de comunicación tán faciéndose ecu de la noticia y la sensación, tanto en Madrid como nel restu del Estáu, ye que dalgo ta moviéndose y que les coses han de cambiar. Un exemplu ye’l fechu de que la Xunta Eleutoral de la Comunidad de Madrid, Asturies, Almería, Granada o Sevilla prohibieren la protesta pola cercanía coles eleiciones, ensin resultáu. La xente, indignao, nun se mueve de nenguna de les zones de concentración.
 
La solidaridá col movimientu que se ta dando nel Estáu ta llevando a la convocatoria de protestes n’otros estaos. Asina, esti miércoles delles persones aconceyáronse frente a la embaxada del Estáu español en Bruxelles/Brussel o London.
 
Otra manera, en Conceyu Abiertu plantegamos una encuesta a los nuesos llectores sobre cómo pue afeutar esti movimientu a les eleiciones del domingu. Dende Asturies.como animamos a los nuesos usuarios a que participen nella.