Ciclu de conciertos nel Muséu de Pueblu d’Asturies

Los músicos Xavier Gómez Martínez (col arpa) y Daniel García de la Cuesta col vigulín y l'arpa) van tocar el domingu qu'entra nuna edición más del ciclu "Música nel Muséu" que lleva la música tradicional asturiana al Muséu del Pueblu d'Asturies de Xixón.

El programa de conciertos va siguir el domingu día 10 cola actuación de los bandurrieros Sonia Pérez Meana, Florentino González Fernández y Daniel García de la Cuesta, mientres que la xornada del 17 de xunetu va ser pa la percusionista Sara Fernández Álvarez y los gaiteros Nel Muñiz Álvarez y Daniel y Natalia Fernández Rodríguez. El calandariu de "Música nel Muséu" va siguir el día 24 con Marta y Luis Díaz Pérez (curdión y gaita) y Pablo Carrera González (gaita) y Lorena Menéndez Rodríguez (curdión diatónica).

El pieslle del ciclu'l día 31 de xunteu va coincidir cola Olimpiada de Deportes Asturianos qu'organiza la Tertulia El Garrapiellu, y esi día va actuar el tríu compuestu por Rubén Fernández Ardura cola gaita, Javier González Lueje nel tambor y cola guitarra y David Varela, curdioneru del grupu "La Bandina". No tocante a la parte deportiva d'esi día, El Garrapiellu va celebrar dientro de les sos yá tradicionales "olimpiaes" prebes de bolos en modalidaes de cuatriada, batiente, bolu de Tinéu y bolu palma, rana, llave, gomeru, baltu, pulsu, corta con hachu, corta con tronzón y castillete y corta n'altura, al empar qu'otros deportes tradicionales como'l tiru de cuerda en poza, llanzamiento de barra y carreres de llecheres.