Ciañu de fiestes con conciertos de rock y folk

L'asociación de Festeyos y Cultura "Torre la Quintana" entama xunta'l Conceyu Llangréu les fiestes de Ciañu, nes que rescamplen la nueche folk d'esti vienres y el conciertu de rock del sábadu.

Una carpa asitiadanel parque Rosario Felgueroso de Ciañu va ser l'espaciu que va acoyer les actuaciones musicales de les fiestes. Ellí va ser esti vienres día 11 la IV Nueche Folk de Ciañu colos grupos, per esti orde, "Llangres", "Batulax", "Ciquitrinos" y "Dixebra". Al día siguiente'l folk dexa'l sitiu al rock con dos grupos de fuera y teloneros asturianos. Los grupos foriatos son "Los Lunáticos" y "Los Rebeldes", la primera ye la banda murciana del antiguu guitarrista de "M-Clan" Santi Campillo, que dempués dexar el grupu decidió llevar alantre esti grupu xunta Miguel Bañón, l'otru pegoyu de "Los Lunáticos" y col que llevaba munchos años faciendo pequeños conciertos acústicos. Agora esta pareya cuenta col sofitu de toa una banda y tres firmar un contratu cola discográfica "Santo Grial" sacaron a la cai'l so primer cd "Con la música a otra parte". De "Los Rebeldes" poco podemos contar, la banda de Carlos Segarra sigue nos escenarios dempués de tantos años de rock "sureño" y ta acabantes de sacar l'últimu discu "Rebeldes y Rebeldes". Los teloneros asturianos vienen d'Uviéu y son "Los Bourbon", banda de rock asturiano que dempués d'unos años de trabayu van grabar el so primer discu esti agostu.

Amás de los conciertos del vienres y del sábadu tamién va haber actividaes a lo llargo de los trés díes, vienres sábadu y domingu, coles clásiques verbenes con orquestes como "Dominó" "Zingaros" o "La Década Prodigiosa".