Ciañu torna a acoyer el conciertu del 1 de mayu tres un añu de parón

El conciertu de la folixa del 1 de mayu qu’entama’l FUSOA y el CSA La Semiente torna a celebrase tres un añu de parón. El Cine Ideal de Ciañu acueye otra vuelta un eventu nel que van actuar Dixebra, Skontra, Zigua, I.R.A. y Arma X.

Pese a que’l 1 de mayu cae esti añu en miércoles, la folixa va treslladase al sábadu 4, al contrario que n’ediciones anteriores, que tenía llugar na mesma xornada que’l Día del Trabayador. El cartelu va ser otra vuelta asturianu dafechu, cola presencia de dos bandes veteranes de la escena musical asturiana, Dixebra y Skontra, que van tar acompañaes d’I.R.A., Zigua y el raperu Arma X.

El preciu de les entraes pal conciertu, que va principiar a les 19 hores, ye de 10 euros, anticipada, y de 12, na puerta, anque tamién hai la posibilidá d’aportar perres a la caxa de resistencia del Fondu xUnitariu de Solidaridá Obrera d’Asturies (FUSOA) al traviés de bonos de 2 euros. Les entraes anticipaes tán disponibles nos llugares siguientes: El Trisquel, Picu Rabicu, llocal de la CSI, Sidrería Canteli y Sestaferia (Xixón); L’Esperteyu (Uviéu); Serinsa Llaviana Informática (Llaviana); CSA La Semiente y Chigre Ochobre (L’Entregu); La Folixa (Ciañu); La Industria (Sama); Matteria (La Felguera); y El Judá y El Diañu (La Pola Siero). Para facilitar l’asistencia de públicu, la organización va poner a disposición de los interesaos autocares dende Uviéu y Xixón por 5 euros. Les places van poder reservase en L’Esperteyu y na Sidrería Canteli, de manera respeutiva.