Chigres del centru y l’oriente d’Asturies van estrenar la primer sidra del añu de mazana selleicionada

Más de 65 chigres del centru y del oriente d’Asturies van participar nes II Xornaes de Sidra d’Escoyeta que van celebrase ente’l 19 y el 23 de marzu. Estes sidreríes van vender la primer sidra del añu xunto con una cazuelina por 3 euros.
 
La iniciativa, entamada pola Asociación de Llagareros de Sidra d’Escoyeta, tien como oxetivu promocionar la primer sidra del añu, esto ye, sidra ensin trasegar, pa recuperar asina la tradición d’espichar los toneles nesta época del añu, enantes de la llegada de la primavera. D’esta forma, los chigres que participen nestes xornaes van vender esti tipu de sidra que dende hai trés años ellabora Trabanco, Peñón, Foncueva y Muñiz. Hai que destacar que la sidra d’escoyeta ta ellaborada con 20 variedaes de mazana autóctona y ha de pasar una serie de controles nel procesu d’ellaboración qu’asegura que se cumpla’l Reglamentu d’Usu de la Sidra Natural de Calidá. Amás d’estes auditoríes, finalmente namái se corchen aquellos toneles que consigan una nota superior al notable nuna mesa de preba.
 
De manera paralela a les xornaes, una continuación de les celebraes l’añu pasáu en Gascona, va entamase un programa d’actividaes de divulgación de la sidra de calidá. Per una parte, los cuatro llagares que conformen l’asociación van ufrir a los veceros la posibilidá de conocer les sos instalaciones previa reserva nel corréu electrónicu info@gacomunicacionglobal.com. El martes y el miércoles, a les 19 hores, va poder visitase Trabanco y Muñiz, mentes que’l miércoles y el xueves, a la mesma hora, van abrise les puertes de Peñón y Foncueva. Otra manera, les persones que disfruten de les xornaes van entrar nel sorteu de 25 places dobles pa participar nel II Tour de la Sidra d’Escoyeta, un percorríu per estos cuatro llagares pa conocer toles fases de la ellaboración de la bébora tradicional del país: floración y collecha, mayanza, fermentación, trasiegos y, pa finar, una preba y una espicha.