Chechu Rubiera va participar nuna marcha ciclista per Xixón en protesta contra l’alta tensión

|

L’ex ciclista profesional Chechu Rubiera va participar esti domingu nuna marcha ciclista per Xixón en protesta contra l’alta tensión y en defensa del mediu ambiente. Ésta va tener salida n’El Rinconín al meudía y va acabar na Plaza Mayor.
                                                                                         
El Coleutivu d’Afectaos pola Llinia d’Alta Tensión Costa Verde, compuestu principalemente por delles asociaciones de vecinos de Xixón, Siero, Sariegu, Bimenes y Nava, entama esta marcha ciclista baxo’l lema ‘Contra les llinies d’alta tensión, en defensa del mediu ambiente y contra la invasión llétricomagnética na zona rural’ a la que conviden “tanto a clubes ciclistes, como asociaciones vecinales, ecoloxistes y, en xeneral, a tolos coleutivos o persones con un mínimo de sensibilidá hacia’l mediu ambiente”. Chechu Rubiera, vecín de Valdornón, una de les parroquies afectaes pola llinia Costa Verde, tien confirmada la so presencia nesta iniciativa ciudadana.
 
“La nuesa comunidá lleva años siendo esportadora neta d’enerxía llétrica: la media de producción de 10 años p’atrás ta nunos 20.000 Gwh anuales y el consumo anda por los 8.500 Gwh. Col 2,4 por cientu de la población española aportamos el 6,5 por cientu de enerxía vertía a la rede”, espliquen nun comunicáu. Asina, la enerxía que producimos nel país “mándase fuera al traviés de 9 llínees d’alta tensión: 3 pa Cantabria, 3 para Lleón y 3 para Galicia, de les que cuatro son de 132 kV, cuatro de 220 kV y, la restante, con La Robla, de 400 kV. Y a elles, súmase agora la estrenada recién Soto-Penagos, tamién de 400 kV”, añade’l Coleutivu. Pese a esta llista amplia, los afectaos pola alta tensión recuerden qu’hai prevista otra pal sur (Sama-Velilla) y pal oeste a Fonsagrada, y, “por si fuera poco otra más, la Costa Verde, tamién de 400 kV y que saldría de Gozón pa pasar per Xixón, Siero, Sariegu, Nava, Bimenes, Llaviana y acabar en Samartín del Rei Aurelio”. “Ésta ye la que nos trae equí, cansaos yá d’esti despropósitu de cables, torres, subestaciones y centrales, ensin más interés que l’arriquecimientu de cuatro empreses yá bien grandes”, denuncien al mesmu tiempu que reclamen “democracia, ésa na que’l pueblu fala y decide”.
 
La ruta prevista pa esti domingu, con salida a les 12 hores d’El Rinconín, ye la siguiente: paséu del Rosario Acuña, avenía de José García Bernardo, avenía de Rufo García Rendueles (pel paséu del Muro), Plaza Mayor, plaza’l Marqués, Rodríguez Sampedro (pel paséu de Fomento), playa d’El Natahoyo y vuelta pel mesmu camín hasta la Plaza Mayor. Nesi puntu va tener llugar una concentración, alredor de les 12.30 hores, pa reclamar un plan enerxéticu p’Asturies, alertar de los efeutos negativos pa la salú de les llinies d’alta tensión y recordar qu’éstes nun son necesaries nun país con escesu de producción llétrica.

Contador Estadistiques