Charlie llega cedíu al Uviéu pa reforciar la defensa

|

Tres el fichaxe de Manuel Redondo, l’Uviéu zarró esta mañana’l segundu refuerzu del mercáu d’iviernu, tamién pa la defensa. Trátase del central inglés Charlie Dean l’Anson, que llega cedíu pol Elche tres nun trunfar nel Alcorcón esta temporada, onde xugó 9 partíos, 7 d’ellos como titular.

El xugador nacíu en Luton pero criáu en Málaga, onde marchó a vivir a los 7 años, ye del 1993, polo qu’ocupa ficha sub-23, lo que dexa al club azul con una senior llibre que podría ser pa un home d’ataque tres la rescisión de contratu de Josep Señé, que va siguir nel grupu 1 de Segunda División B nes files del Celta B. Charlie, nome qu’utiliza nel mundu del fútbol, debutó nel so país d’orixe con 17 años nel Grimsby Town, club que compite na Conference Premier (Quinta División), pa depués dar el saltu al Estáu español gracies al interés del Elche. Nel club ilicitanu pasó a competir nel so filial, equipu col qu’algamó dos ascensos consecutivos pa llegar a Segunda División B.

De la mano de Fran Escribá debutó la temporada pasada en Primera División contra l’Espanyol, categoría na que disputó un partíu más na xornada cabera col Granada. La intención del club d’Elx yera la de da-y minutos al inglés, polo que decidió la so cesión al Murcia, que finalmente nun se concretó tres la decisión de la Lliga de Fútbol Profesional (LFP) de descender a los pimentoneros a la categoría de bronce por nun cumplir los ratios establecíos pol organismu. Finalmente recaló nel Alcorcón, onde nun acabó de convencer a José Bordalás, disputando un total de 653 minutos en 9 partíos, 7 d’ellos como titular, nes que recibió 3 tarxetes marielles. Ayeri rescindió col equipu madrilanu que milita en Segunda División y güei anuncióse la so incorporación al Uviéu hasta’l final de temporada.

Contador Estadistiques