Cesáreo Fernández recupera los topónimos d'Avilés

El filólogu Cesáreo Fernández yá tien fechu un importante avance del Estudiu Prospectivu Toponímicu del Conceyu d'Avilés, documentu que s'ellabora a partir d'un conveniu apautáu ente'l conceyu d'Avilés y el Principáu y que quier ser la base pa un estudiu fondu de la toponimia local.

Cesáreo Fernández, filólogu avilesín de trayectoria conocida, ye'l responsable d'esti estudiu que yá se-y remitió a la Xunta Asesora de Toponimia del Principáu d'Asturies (XAPTA) y que se tien nun llabor de campu fechu a partir d'entrevistes cola xente mayor del conceyu. El EPTA espeya les impresiones de los informantes orales sobre los nomes de les parroquies y barrios, anque tamién fai dacuando apuntes sobre toponimia menor, recoyendo los nomes populares de montes, praos, regatos y fontes conocíos nel conceyu. Per otra parte, amás de ser un estoyu de nomes, l'EPTA preséntase tamién como un avance d'estudiu dialectal de la zona, destacándose nesti sentíu que munches de les grabaciones feches ufierten unos testimonios orales que munches vegaes resulten sorprendentes porque espeyen rasgos que se teníen por recesivos o que taben poco documentaos.

La bayura de cambeos espaciales que sufrió Avilés na segunda metada del sieglu XX cola llegada d'Ensidesa condiciona l'estudiu de tola toponimia avilesina, en cuantes qu'apaecen barrios nuevos que se superponen a otros vieyos y amás los que yá esistíen queden difuminaos na trama urbana nueva y ye difícil apautar qué territoriu define esactamente cada nome

Les soluciones toponímiques qu'aporta l'estudiu de Cesáreo Fernández nun van ser definitives hasta que nun reciban el preste de la XAPTA, organismu del competente del Principáu en cuestiones de toponímia yque tien dende va unes selmanes l'encargu oficial del conceyu de facer l'espediente toponímicu d'Avilés.