Cerca de mediu millar de contaxos esti miércoles

|
Vacunación en Perchera-La Braña panorámico

Salú comunicó 475 casos nuevos, con una tasa de positividá diaria del 14,44 por cientu.

Sigue l'ascensu imparable de la curva de contaxos motiváu principalmente pola gran cantidá de casos nel tramu d'edá de 15 a 29 años, con un aumentu nos últimos díes tamién de la de 31 a 39 años, entovía en procesu de vacunación. La comunicación última de la conseyería cifra en 475 –l'actualización rebáxala a 474 por un duplicáu en díes previos– los contaxos, 86 más que'l martes, cuando s'informó de 389, y la cantidá más alta dende'l 1 de febreru, día nel que se rexistraron 479 –llueu d'una revisión, 478–.

El Serviciu de Salú del Principáu d'Asturies (SESPA) fixo 3.406 pruebes de diagnósticu d'infeición activa, polo que la tasa de positividá s'asitió nel 14,44 por cientu, superior a la de la xornada anterior, cuando quedó nel 11,75 por cientu con 3.523 tests realizaos. A 7 díes esti porcentaxe taba enantes de l'actualización de los datos oficiales nel 11,8 por cientu –ayeri xubió al 12,86 por cientu–.

Per octavu día nun hai que llamentar muertes cola enfermedá que causa'l coronavirus SARS-CoV-2, lo que fai que siga en 1.981 el total de persones finaes nel andanciu. Tán hospitalizaos 49 pacientes con confirmación o sospecha de COVID-19, 3 menos que'l martes, a los qu'hai que sumar 11 ingresaos na UCI, 1 menos.

19 biltos activos

Asturies informó a Sanidá de la esistencia de 19 biltos activos, 3 más que la selmana pasada, con un total de 225 casos. 9 d'ellos detectáronse estos 7 díes últimos, comunica la conseyería.

Na semeya, vacunación ayeri nel pabellón de Perchera-La Braña, en Xixón.

Contador Estadistiques