Cerca de 200 vecinos reclamen na cai l'arreglu del Altu del Pravianu

Les Asociaciones de Vecinos de Santiagu'l Monte (Castrillón) y Ranón (Sotu'l Barcu) cifraron en 200 persones los participantes na manifestación que se celebró esti miércoles pa reclamar l'arreglu del Altu'l Pravianu.

Les Asociaciones de Vecinos de Santiagu'l Monte (Castrillón) y Ranón (Sotu'l Barcu) cifraron en 200 persones los participantes na manifestación que se celebró esti miércoles pa reclamar l'arreglu del Altu'l Pravianu.
Los manifestantes, ente los que tamién s'alcontraben representantes vecinales d'otres poblaciones castrillonenses y d'Avilés, partieron a les cinco de la tarde de la zona de L'Águila en dirección al conceyu castrillonense. Al llegar ellí lleeron un comunicáu nel que piden que s'entamen les obres d'arreglu de la carretera nos dos puntos.
  
Hai dos años prodúxose'l primer estrozu, nel Altu'l Pravianu, y el pasáu mes de xunu, por causa de les fuertes agües, argayó parte del vial en L'Águila, algo que les asociaciones calificaron como "un abandonu" per parte de les alministraciones, "que supón perxuiciu pa los vecinos y empresarios de les poblaciones próximes".
  
"Obliga a los habitantes y usuarios de la zona y del aeropuertu a utilizar rutes alternatives que n'ocasiones suponen rodios d'hasta diez kilómetros", dixeron los vecinos. Polo que se refier a l'actividá económica, afirmaron que "los negociaos tán condenaos al ostracismu pola imposibilidá d'accesu rodáu".
  
Los representantes vecinales remataron la so intervención afirmando que, "puesto que s'observó maquinaria que paez indicar l'entamu de los trabayos d'arreglu, acaben les obres nel menor plazu posible".