Centenares de mineros lleguen a Uviéu tres dellos díes de marcha

Centenares de mineros llegaron el xueves a Uviéu tres dellos díes de marcha per Asturies pa manifestase pel centru de la ciudá col fin de reivindicar la viabilidá del carbón y el futuru del sector n'Asturies.

Na capital asturiana únense asina, dos coles mineres, una que salió esti mediudía del conceyu de Morcín en dirección a Uviéu con cientos de mineros de les cuenques del Caudal y el Nalón, con otra que llega dende l'occidente asturianu. 
  
Los mineros de les cuenques del Caudal y del Nalón llegaron pela Avenida d'Hermanos Pidal con pancartes con conseñes como 'Pol futuru del sector mineru. Planta de CO2 n'Asturies', tirando petardos y con xiblatos. A les 18.30 hores uniéronse a estos los mineros del occidente que llegaron pela Avenida de Galicia vistíos con un monu azul y cascos con linterna.
  
Cuando s'unieron, fueron recibíos con aplausos polos presentes, cerca d'un centenar d'uvieínos que mostraron asina'l so apoyu a la causa. Los coches de la organización punxeron cantares vinculaos al sector como 'Nel pozu Maria Luisa', mientres los secretarios xenerales de CC.OO y d'UXT, Antonio Pino y Justo Rodríguez Braga, respectivamente, encabezaben la marcha portando una pancarta que dicía 'Real decretu Yá. Defensa del carbón, comarques mineres y empléu'.
  
La marea de xente llegó hasta la Plaza d'América onde dellos mineros ficieron una sentada. Dende esti puntu, fueron volviendo a entamar la marcha pa dirixise en dirección a la Xunta Xeneral del Principáu, cantando lemes como "mineros unidos jamás serán vencidos" y "somos mineros". Nel parlamentu asturianu van recibilos los cuatro grupos parlamentarios.
  
Trátase, d'esta manera, de la última etapa de les marches entamaes el domingu. Sicasí, ta previsto que la próxima selmana haya otros dos díes de güelga. Dende los sindicatos señaláse que, mientres haya compañeros en güelga de fame nel Ministeriu d'Industria y nun se desbloquie la situación, va siguir el calendariu de movilizaciones.
  
Les reivindicaciones céntrense en solucionar el problema d'impagos a los trabayadores per parte de dos empreses mineres privaes y na aprobación del real decretu d'usu del carbón nacional. Amás, sindicatos y trabayadores consideren fundamental el nuevu reglamentu d'ayudes al sector y la diversificación de les comarques mineres.