Celia González presenta la so música n’Avilés

El Centru Municipal d'Arte y Esposiciones d'Avilés "L'Arbolón" presenta esti xueves 6 dende les 20:15h de la tarde la obra de la intérprete de zanfona Celia González, que va tocar los temes del so primer discu "Coloradina la Guinda".


Intérprete de llarga trayectoria musical, Celia González Baschwitzestudió solfeo y piano en conservatoriu d'Uviéu, pasando pel coru universitariu. Los grupos de música antiguo Xistras y La Ghironda contaron cola so presencia, ello dempués d'estrenase como zanfonista col grupu Andecha Folclor d'Uviéu nel 1990. El so curriculum musical incluye la dirección musical de la parte vocal nel espectáculu sinfónico - coral "Kelthiké" de Ramón Prada y la fundación del grupu musical y d'investigación etnográfica "Muyeres".


La zanfona o gaita de rabil, desapaeció col últimu zanfoneru tradicional d'Asturies a mediaos del sieglu XX. D'entós hasta primeros de los ochenta esti instrumentu taba casi desapaecíu n'Asturies. El movimientu de recuperación y dignificación de la cultura asturiana dende los 70 fizo que la zanfona pudiere salir adulces del so escaezu, y ello ye que pudo entamar a sentise tocada por dalgunes persones o incluso en dalgún discu históricu del folk asturianu como "Beleño" (1983) del grupu del mesmu nome que formaben ente otros Frankie Delgado y Daniel García de La Cuesta. D'aquellos primeros intentos de recuperación hasta'l día de güei la nómina d'intérpretes de gaita de rabil n'Asturies enanchó enforma, contándose anguaño con una bona escuela ente la que rescampla'l nome de Fonsu García, qu'asoleyare nel 1998 "!Ea, Señores Usías!" el primer discu dedicáu dafechu a esti instrumentu y un interesante trabayu que xorrascaba nos usos populares de la zanfona nel sieglu XIX.

Otres dos bones intérpretes d'esti instrumentu son ensin dulda Merce Santos, zanfonera de "La Bandina" y por supuesto, la mesma Celia González.