Celébrase esti sábadu un festival folk solidariu con Malawi

Na mañana d'ayeri presentóse a los medios de comunicación un conciertu nel que dellos grupos representantes de lo meyor del folk asturianu van xuntase pa sofitar una causa solidaria, la construcción d'una escuela de música en Malawi.

El conciertu va ser mañana sábadu 3 de xunu, y nél vamos poder ver les actuaciones del grupu de pandereteres Dulcamara, el tríu Tuenda, DRD y La Bandina. La entrada pal conciertu, qu'entamará a les 20:00 hores y finará a les 22:00 hores, val namás que 5 euros, anque pa toos aquellos que nun puedan dir o quieran sofitar con más perres va haber una fila cero faciendo un ingresu na cuenta bancaria 2038-1095-71-6000438204 (cajamadrid), especificando nel conceptu "malawi suéname". Na rueda de prensa la principal organizadora del eventu, Eva Braga Riera, esplicó que les perres que se saquen van dir pa la ciudá de Chezi en Malawi onde existe una misión qu'agospia a neños enfermos, güérfanos o que comoquiera tán marxinaos de la sociedá. Ello ye que col envís de meyorar la calidá de vida d'estos neños naz esti proyectu pa la creación d'una escuela de música en Chezi, p'aportar daqué a la vida educativa cultural d'estos neños.