CC.OO y UXT llamen a manifestase contra la reforma llaboral

Los sindicatos CC.OO y UXT llamaron esti llunes a la sociedá asturiana a manifestase contra la reforma llaboral nuna manifestación que va tener llugar el sábadu 18 n'Uviéu.

Les centrales pidieron tamién a los ciudadanos firmes pa consiguir presentar nel parlamentu una Iniciativa Lexislativa Popular que proponga la paralización de la reforma llaboral.
  
Asina lo anunciaron güei los dos secretarios xenerales de les centrales n'Asturies, Antonio Pino (CC.OO) y Justo Rodríguez Braga (UXT), que criticaron en rueda de prensa les últimes midíes anunciaes pol Gobiernu: la eliminación de la paga de 426 euros a los paraos, la privatización de parte d’AENA y les lloteríes del Estáu y los retayos d'impuestos a les empreses.
  
Por tou ello, dambes organizaciones desenvuelven una campaña de movilizaciones, que les sos acciones más importantes van ser les manifestaciones del próximu 18 d'avientu y la recoyida de firmes.

La primera, n'Uviéu, va tener llugar a les 12.00 hores y va salir de la Estación de Renfe. La segunda va dar empiezu cuando la Xunta Electoral almita a trámite la Iniciativa Lexislativa Popular. Les centrales van tener nueve meses pa consiguir mediu millón de firmes.

Antonio Pino llamó a los asturianos a secundala, pa "faer reflexonar a los grupos políticos nel parlamentu sobre la conveniencia de poner en marcha estes midíes agresives".
  
Más movilizaciones
Amás, el día 15 tamién va haber movilizaciones. Les organizaciones convocaron paros parciales y asamblees nos centros de trabayu, amás d'una concentración de cuadros sindicales na Plaza d'España, frente a Delegación de Gobiernu.
  
La intención de les organizaciones, según Braga, "ye la movilización que vamos siguir, pos el conflictu sigue abiertu y los retayos y midíes amplíense, nun hai reformes sinón continuos retayos del estáu del bienestar". Al so xuiciu, "la situación ta peor que cuando convocamos la fuelga xeneral del 29 de setiembre".

Lo qu'esixen al Gobiernu, según el líder sindical "ye la rectificación de la reforma y la reorientación de les  polítiques económicu y social".
  
Propuestes
CC.OO y UXT proponen nun documentu conxuntu "combatir la economía somorguiada y el fuximientu fiscal; recuperar los impuestos de patrimoniu y sucesiones; crear nueves víes impositives; amontar l'IRPF de les rentes más baxes; endurecer el tratamientu fiscal a los intereses y dividendu de plusvalía a les rentes del capital; rediseñar la imposición de les Sicav; aumentar el IVA a los bienes de luxu; y crear una tasa específica al sector financieru".
  
Según el líder de CC.OO, de caltenese l'actual llínea de midíes, "nun sería descartable otru escenariu de fuelga xeneral", pos, según recordó, "tenemos 78.000 paraos n'Asturies y hai perspectives d'estancamientu".

Situación asturiana
En rellación con Asturies, Pino criticó duramente al presidente del Principáu, Vicente Álvarez Areces, por considerar "una bona noticia", "el zarru gradiáu de la minería en 2018". Dende'l so puntu de vista, "ye un sector fundamental".

Pino, en nome de dambos sindicatos, esixó tamién la presencia de los dos centrales y de la patronal FADE, como representantes de la sociedá asturiana en Caxastur. Incidió nesti puntu, ante la reforma plantegada, que nestos momentos acuta un 10 por cientu de representatividá a entidaes sociales. "Tal paez que pudieren ser los centros asturianos", señaló Braga, recordando que CC.OO, UXT y FADE son los axentes sociales mayoritarios.
  
El líder d'UXT tamién s'asitió "en contra de la bancarización de les caxes". "Creemos qu'inda teníen un sitiu de la banca pública pa desenvolver les sos actividaes, pero paez que Caxastur lliberó'l procesu intelixentemente, por que sía el mazcarón de proa de lo que ye una gran entidá financiera que pueda competir nel futuru".