CCOO denuncia la baxa tasa d'emancipación de la mocedá

El secretariu xeneral del sindicatu CC OO d'Asturies, Antonio Pino, denunció ayeri que la tasa d'emancipación de la mocedá asturiano ye la más baxa de tol estáu y propunxo la creación d'un "Plan Integral pa la Empleabilidá y la Vivienda" empobináu a meyorar la situación de los asturianos de menos de 34 años, que dixo que presenten la tasa d'emancipación más baxa d'España, con un 37,2 por cientu acordies con datos del mesmu sindicatu.

Pino esplicó que l'alta temporalidá llabora, qe llega al 51,6% y l'altu preciu de la vivienda son les principales causes d'esta situación, y denunció la falta de tresversalidá de les polítiques del executivu asturianu como ún de los puntos a meyorar nesti sentíu, ello con reconocer que les polítiques entamaes dende'l gobiernu meyoraron la situación énte lo que calificó de "perspectiva de futuru esmolecedora" pa la mocedá.

Pino sorrayó qu'Asturies tien cada vegada menos población d'ente 16 y 30 años , por causa de la baxa natalidá y pola emigración a otres comunidaes, un factor que ye una torga pal desarrollu económicu y que se ve agraváu pola especialmente baxa tasa d'actividá de la mocedá que queda n'Asturies, qu'alvirtió que ye 8 puntos más baxa que la media española. Esta baxa tasa d'actividá tien que ver pal sindicalista col fechu de que la mocedá d'Asturies echa más años n'estudiar y llevar alantre una carrera académica, presentando Asturies una media de persones con estudios superiores 10 puntos penriba de la media española. Sicasí, Pino llamentó qu'esi esfuerzu formativu "nun s'aprovecha".

El secretariu xeneral de mocedá de CCOO, Adrián Redondo, sorrayó les desigualdaes salariales que carez el sector de menores de 30 años, que cobren un 19% menos de sueldu pol mesmu llabor que los que pasen d'esta edá.