CC OO Xixón califica de “acción discriminatoria, impropia d’una sociedá democrática”, la postura de VOX pa col asturianu

La Xunta Comarcal de Xixón de Comisiones Obreres (CC OO) asoleyó un comunicáu “en defensa del asturianu nes fiestes de Xixón” depués de les declaraciones últimes feches pola edil de VOX, Sara Concepción Álvarez Rouco. Reclama al Conceyu y a los responsables de Festexos que “reconsideren la so posición” y fai un llamamientu a la ciudadanía “pa que nun ceda a les presiones y nun renuncie a usar l'asturianu”.

“La intención, espresada pola conceyala de Festexos, de prescindir de los y les artistes qu’usen l’asturianu ye una acción discriminatoria, impropia d’una sociedá democrática y contraria a la normativa citada”, en referencia a la Constitución, la Carta Europea de les Llingües Minoritaries, l’Estatutu d’Autonomía la Llei d’Usu y Promoción del Bable/Asturianu. “La supresión d’espectáculos en llingua asturiana na programación municipal nun afecta namás a la producción artística más contemporánea: supón prescindir de celebraciones tradicionales compartíes por tola comunidá”, citando los concursos de tonada, los cantares de chigre o les actuaciones de grupos folclóricos.

“De llegar a cumplise, diba ser una actuación política autoritaria y opuesta a les costumes y gustos de la ciudadanía”, añade’l sindicatu, que recuerda que “Xixón lleva siendo, dende va décades, una ciudá exemplar no que cinca a la promoción y normalización del asturianu”. Nesti puntu rescampla que “nunca se dieron tensiones nin hubo protestes ciudadanes en rellación con esti asuntu” porque la sociedá xixonesa, “madura y arguyosa de la so tradición cultural, siempre se comportó como una comunidá billingüe, onde caún y caúna pue escoyer llibremente la llingua de comunicación o d’espresión artística sin sufrir nengún tipu de refugu o condena”.

Asina, “actitúes como les manifestaes nos últimos díes, onde se cuestiona mesmamente l’usu del nome oficial de la ciudá (Xixón/Gijón), revelen un espíritu impositivu y un deséu de crear un

problema onde nun lu había, amás d’enseñar actitúes supremacistes, contraries a la igualdá de les llingües, que la sociollingüística y el derechu abandonaron cuantayá”. Por too ello, CC OO Xixón espera que “l’Ayuntamientu de Xixón y, sobre manera, les persones responsables de la programación de festexos, reconsideren la so posición dando entrada nella a toles llingües que se falen n’Asturies”.

D’igual forma, faen un llamamientu a la ciudadanía “pa que nun ceda a les presiones y nun renuncie a usar l’asturianu pa comunicase o pa realizar espresiones artístiques”.