CC OO Enseñanza d'Asturies y Aragón dediquen unes xornaes a les llingües propies

Celébrense en llinia'l martes y el xueves.

Baxo'l nome de 'Selmana de les Llingües, aragonés y asturianu', les federaciones d'Enseñanza de Comisiones Obreres (CC OO) d'Aragón y Asturies entamen unes xornaes en llinia dedicaes a les dos úniques llingües del Estáu que nun tienen el calter d'oficial. D'esta forma pretenden reivindicar "la importancia del aragonés y l'asturianu, amás d'estudiar les midíes que se tán tomando pa garantizar l'enseñu de les llingües propies (aragonés y asturianu) nos centros educativos d'Aragón y Asturies n'igualdá de condiciones con otres enseñances reglaes".

Na primer sesión, prevista pa esta tarde a les 18 hores, van tomar parte los direutores xenerales de Política Llingüística de los dos países, Antón García y José Ignacio López Susín; Xosé Ramón Iglesias Cueva, secretariu de l'Academia de la Llingua Asturiana (ALLA); y María Pilar Benítez, vicepresidenta de l'Academia Aragonesa de la Lengua. Mentes, el xueves a la mesma hora, van intervenir Marta Mori, profesora de Secundaria y vicepresidenta de l'ALLA; Inaciu Galán, profesor de Secundaria y doctor de la Universidá d'Uviéu; Yolanda Mur, investigadora especializada na escuela rural, maestra d'Educación Infantil y Primaria, y de Luenga Aragonesa; y Iris Orosia Campos, investigadora y docente na Área de Didáctica de la Lengua y la Literatura de la Universidad de Zaragoza, doctora n'Educación y direutora del Diploma de Especialización en Filología Aragonesa.

Los temes a tratar, ente otros, van ser la ordenación curricular y llexislativa, los programes educativos pal desendolcu de les llingües propies, y los programes y planes de formación pal so profesoráu, centrando la segunda xornada n'analizar la situación actual del asturianu y del aragonés nos centros educativos, asina como na sociedá civil. Tamién va aldericase sobre cómo ta contempláu'l profesoráu dientro de los centros educativos, les árees d'impartición de les llingües y programes de desarrollu, la visión social respeuto a la educación en llingües propies y la so enseñanza na universidá y en centros d'adultos.

Les dos actividaes que conformen esta selmana dedicada por CC OO Enseñanza a les llingües asturiana y aragonesa va poder siguise en direuto al traviés d'esti enllaz, previa inscripción nesti formulariu.